© .

Sa Festa natzionale de su 25 de abrile ocannu l’acumpàngiat unu programma de initziativas ricu meda.

Mancari bi siant sos impèigos pro s’emergèntzia sanitària e respetende sas normas chi proibint sos atropèllios de gente e òbligant su respetu de s’istesiamentu intra de sas persones, s’ANPI e sas istitutziones locales ant a onorare sa Festa de sa Liberatzione dae su nazifascismu cun addòbios in presèntzia e cunferèntzias in su web.

Sa die s’at a abèrrere a sas 10 in su Tzentru pro sos Giòvanos intituladu a Flavio Busonera, su partigianu gherreri aristanesu mortu dae sos fascistas in Pàdua su 17 de austu de su 1944. Su sìndigu de Aristanis Andrea Lutzu, sa vitze-prefeta Danila Congia e sa presidente de s’ANPI Carla Cossu ant a pònnere una corona de frores e ant a lèghere sos nòmenes de sos partigianos de Aristanis.

A sas 10.15 e a sas 10.45 addòbios sìmiles s’ant a fàghere in su Parcu de sa Resistèntzia de arborada de sa Repùblica e in dae in antis de su monumentu de sos Mortos in gherra de pratza de Marianu.

S’ANPI de Aristanis at programmadu fintzas una filera de cunferèntzias e resonadas in dereta e registradas in contu de sa Resistèntzia e de s’Antifascismu.

Dae sas 8.00 a sas 20.00 custas fainas de s’ANPI de Aristanis s’ant a pòdere bìere in su canale Youtube https://www.youtube.com/channel/UCoZ63vRxqOB1tKgQ8XVT5Ag e in sa pàgina Facebook de s’assòtziu.

A manos de pare cun su Cumandu provintziale de sos Carabineris de Aristanis e cun su Tenente Coronellu Erasmo Fontana s’at a trasmìtere sa cunferèntzia intitulada “Su rolu de sos Carabineris de sa provìntzia de Aristanis in sa gherra de liberatzione dae su nazifascismu”. In custa cunferèntzia s’ant a regordare, intra de sos 25 carabineris-partigianos de sa provìntzia de Aristanis, a su Maresciallu Antonio Raga (nàschidu in Bosa) e a Giovanni Mongili (nàschidu in Sèdilo), mortu in Jugoslavia gherrende contras de sos nazifascistas.

In prus, a manos de pare cun sa CGIL e cun su segretàriu Andrea Sanna s’at a trasmìtere sa cunferèntzia intitulada “Resistèntzia, ricostrutzione, Costitutzione e solidariedade eris e oe”.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22