Locandina
© https://www.facebook.com/museogennamaria/photos/a.418059751595272/4138555329545677/

In su mese de maju de su 1961 in una biddighedda de sa provìntzia de Aristanis est nàschida una mustra de cuadros tèssidos e de tapissos fatos dae una cambarada de pitzocas tessidoras. Oe, a pustis de 55 annos, cussa espositzione est sa mustra prus importante de artesania artìstica de totu sa Sardigna.

Tramas e ordìngios, linna frorigiada chi testimòniat traditziones de sèculos, oro fine e lùghidu, tzeràmicas de milli formas e colores, lughes de ferros, bidros e gurteddos, particulares in fine de canisteddutzas intèssidas e peddes cosidas si mustrant a ogros de sos bisitadores in unu tretu de espositzione de prus de 2500 metros cuadros.

S’agiudu de sos mastros artesanos de Mòguru cun architetos e disegnadores bogat a campu una filera de elementos in ue connoschèntzias e manualidade, traditzione e novidade s’aunint e aberint caminos noos a ideas diferentes de arredamentu.

Pro fàghere nàschere una mustra in sa fiera, onni artesanu at pensadu e fatu pròpiu pro s’eventu unu produtu originale, interpretende in libertade su tema de “Bisione”, logu immaginàriu in ue sa creatividade podet biagiare sena de làcanas.

Irrichint galu de prus sa mustra sos cuadros tèssidos antigos, òperas de arte de a beru, testimòngias de una traditzione de tessìngiu chi in Mòguru est bia dae prus de tres sèculos.

In sa fiera s’at a pòdere tastare su binu de sa Cantina Sotziale “Il Nuraghe” chi est apretziadu meda e chi andat paris cun sa variedade manna de sabores e nuscos de sa terra e de su mare, presentada dae sa “Blue Marlin srl”.

Sa fiera permitit a unu bisitadore atentu de connòschere una parte de Sardigna prena de istòria e cultura, inghiriadu dae risorsas de natura e de architetura importantes chi distinghent totu su territòriu de Parte Montis: su logu archeològicu de Cuccurada, su geo-museu Monte Arci e su museu I Cavalieri delle colline de Masuddas, su museu Turcus e Morus de Gonnostramatza e sos logos archeològicos de Pompu e de Siris.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22

Organizzazione

Fiera dell'Artigianato artistico della Sardegna
Piazza Martiri della Libertà 09095 Mogoro
Sito Web
info@fierartigianatosardegna.it
+39 0783 997 034