Sardinia Anima Mundi
© web

Tres dies pro Cùglieri e pro su Monteferru, a pustis de su degòlliu ingendradu dae su fogu de su 24 e 25 de trìulas passados. Cùglieri torrat a mòvere cun “Sardinia Anima Mundi”, su fèstival lòmpidu ocannu a sa de chimbe editziones e nàschidu pro fàghere a connòschere sas sabidorias e su connotu de sa bidda de Monteferru.

Sa de ocannu est un’editzione ispetziale: tres dies – su 24 de cabudanni, su 2 e su 3 de santugaine – in ue s’at a faeddare de sa relata intra de s’òmine e s’ambiente. S’arte, sa mùsica, su teatru, s’ingèniu: ònnia apuntamentu s’at a isboligare in s’àndala de sa nàschida noa de su paesàgiu e de sa comunidade, pro apretare sa mòvida noa, cunfrontende-si in laboratòrios e cunvegnos in ue s’at a faeddare de s’istrategia noa de pianificatzione de su territòriu cun totu sos paesàgios diferentes chi presentat e sa richesa de produsimentos, cara a un’idea cumpartzida e respetosa de s’identidade de cussos logos e de sa gente chi bi bivet.

Su 2 e su 3 de santugaine sa manifestatzione s’at a fàghere in su Seminàriu betzu, cun sa corte sua inghiriada dae lògias e cun su teatru pro sos ispetàculos, mentras in su parcu s’ant a cuncordare sas paradas de sas sabidorias e de sos sabores de sos màndigos de su connotu.

Fintzas sa mùsica e sos ispetàculos ant a sighire s’àndala de sa relata cun s’ambiente naturale e cun su resèssere a si nde torrare a istantargiare a pustis de sa rutòrgia. Si prevident ispetàculos a meritzeddu e a prima note, cun artistas meda de bonucoro. Unos cantos ispetàculos e laboratòrios los ant a dedicare a sos pipios e a sas famìllias, cun su teatru banduleri e cun s’arte de sas marionetas. Su programma prus a fine s’at a connòschere in sas dies imbenientes.

Unu pensamentu particulare at a èssere pro sos Sardos disterrados in s’èsteru, chi non podent torrare pro more de sa pandemia: sas fainas de su fèstival ant a brincare comente si siat sas làcanas de s’ìsula gràtzias a unas cantas trasmissiones in dereta, mentras àteros filmados registrados los ant a pònnere in Youtube.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22