Oe est sa Die Internatzionale pro s’eliminatzione de sa violèntzia contra a sas fèminas. Sos botinos arrùbios nde sunt su sìmbulu, dae una idea de s’artista messicana Elina Chauvet, Zapatos Rojos, chi – in su 2009 Ciudad Juarez – aiat postu acanta de pari botinos chi rapresentaiant fèminas furadas, violentadas, mortas, dedichende s’òpera a sa sorre, bochida dae su pobiddu. Oe est una die de riflessione. Est una die chi onni òmine, abbaidende in ogros a sa mama, a sa sorre, a sas fìgias o a cale si siat fèmina, amiga, collega, cumpàngia, pobidda, diat a dèpere pensare a chie est, a ite òmine est. Onni mama crèschet cun amore unu fìgiu, mascru o fèmina. Ma ite sutzedit in conca de unu òmine chi ddu faghet lòmpere a s’idea de si fàghere mere de una fèmina? Comente est possìbile chi s’umanidade in custu viàgiu de crèschida e de imparu ancora oe non siat lòmpia e nde chirrare sas ideas de possessu e de podere de sos òmines subra de sas fèminas? Comente est possìbile chi un’òmine penset de èssere prus mannu e prus respetadu cun s’abusu? Sunt preguntas chi intrant in sas intrànnias de unu mundu e de una umanidade chi bortas meda est cantu de prus atesu dae s’umanu, cantu de prus atesu dae su Deus chi costumamus a pregare. Onni die morint fèminas chi tenent curpas chi si podent agatare solu in sos ogros macos de òmines intzurpados dae sa gelosia, dae sa pagu istima de sé o dae s’idea chi pro èssere prus fortes est pretzisu a umiliare. Nois tenimus su dovere, comente òmines de èssere onni unu su primu esempru pro fìgios nostros. Nois, òmines, tenimus su dovere de non lassare passare mai s’idea chi pro èssere su chi semus, nos depimus pesare che ispigas artas in campos de frores messados. Nois, ispiga sola, sica in mesu a su campu aradu no semus nudda. Semus su chi semus, onni unu, si amus a èssere àbiles de donare su matessi respetu chi diamus a chèrrere, si disigiamus de èssere ispiga e frore in mesu a sos àteros, a sa matessi artesa, cun sa matessi dignidade. Onni botinu arrùbiu est una ispina in su coro de una sotziedade chi furriat sa cara, chi donat pagu importu, chi sanat sas fertas cun s’indifferèntzia. A nois sa responsabilidade. A nois s’esempru. A nois sa testimonia. Mai prus una fèmina morta pro manu de un’òmine. T. C. CONTRO LA VIOLENZA SULLE DONNE, ALCUNE INIZIATIVE IN SARDEGNA: CAGLIARI, DOLIANOVA, ORISTANO, SERRENTI Attività realizzata col contributo della Regione Sardegna – IMPRENTAS 2020-2021. LR 22/2018, art22