A s’addòbiu, cuncordadu paris cun Koinè Ubik Libreria Internazionale, b’ant a leare parte Gian Vittorio Campus, Cosimo Filigheddu e Salvatore Tola.

Mèrcuris 7 de su mese de trìulas, a ora de sas 19.00, in su Polo Tecnico De Villa de bia de Monte Grappa 2, in Tàtari, Mediando Edizioni presentat sas “Memòrias tataresas” de Manlio Brigaglia, un’antologia de unos dughentos artìculos intra de sos prus de importu bogados dae sa rubrica nòdida chi dae su 1994 a su 2018, ònnia chida, at arrichidu a manera acutza e curiosa sas pàginas de crònaca tzitadina e provintziale de “La Nuova Sardegna”.

A s’addòbiu, cuncordadu dae “Koinè Ubik Libreria Internazionale” e dae sa domo de imprenta Mediando a intro de su programma “Tàtari Istadiale”, b’ant a leare parte su sìndigu Gian Vittorio Campus e sos giornalistas e iscritores Cosimo Filigheddu e Salvatore Tola. B’at a èssere fintzas s’editora Simonetta Castia. S’intrada est lìbera e aberta a totus.

S’òpera naschet a tres annos dae sa morte de su grandu intelletuale tataresu, e est prena de mentovos de sas ànimas diferentes de Tàtari, de comente fiat sa tzitade e de su piessignu brullanu de su tataresu, chi su professore impreaiat a manera intelligente e naturale.

Sas memòrias sunt regortas a intro de unos cantos capìtulos a tema, dae sos contigheddos a sa toponomàstica, faeddende de personàgios, acontèssidos ispantosos, anniversàrios e àteras curiosidades. Sa rubrica fiat agabbada su 4 de maju de su 2018, ses dies in antis de mòrrere professore Brigaglia, chi aiat firmadu s’ùrtimu artìculu dedicadu a s’istòria de La Nuova Sardegna.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22