© ufficio stampa

Forma e sustàntzia, sentidu estèticu furriadu a istima pro sa bellesa ma fintzas atentu pro sos contenutos e punna pro su cunfrontu. Cun custa tarea naschet sa prima editzione de su ‘Mòdolo Fèstival: mùsica, arte e cultura in bidda’, resurtadu de s’addòbiu de sensibilidades e boluntades che a pare, sa de sa ghia artìstica de s’apuntamentu nou e sa de s’Amministratzione comunale de sa biddighedda de Pianalza, chi giai dae ora est capatza de inditare s’àndala in sas chistiones de s’amparu de s’ambiente e de s’avaloramentu de sas identidades de sos logos.

Non firmamus su Connotu est unu progetu de Ambra Pintore chi portat in iscena arte, mùsica e cultura de sa Sardigna de oe, foras dae sas maneras de pensare ispartas e dae sas fràsias fatas chi si narant pro interessu in contu de s’ìsula nostra. In intro de su progetu naschet su ‘Mòdolo Fèstival – Mùsica, Arte e Cultura in bidda’, duas dies de addòbios culturales e de arte su 25 e su 26 de cabudanni de su 2021.

Una coa de chida pro promòvere sa cultura, sas artes e sos logos cun addòbios, cuntzertos, laboratòrios creadores, residèntzias, cuncordos artìsticos, presentadas de libros, chi movent dae su cunsideru nou de oe de sas espressadas artìsticu-culturales de sa terra nostra.

Una manera pro pònnere paris sas richesas meda e sas resursas de unu logu in ue, a bortas, onniunu si movet a contu suo e chi si diat chèrrere rapresentare totu, sighende fintzas sa biatzesa de custos tempos e sas cosas mègius chi s’agatant in sos setores diferentes.

Giai in custa prima editzione s’ant a bìdere artistas pianalzesos, ma fintzas produsidores pro incarrerare cun su tempus fainas verdaderas de abbiatzamentu culturale e econòmicu, incoragende una cambarada noa de giòvanos capatzos de isvilupare progetos culturales e artìsticos pro sos logos issoro.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22

Organizzazione

Associazione Culturale Istranzos de Domo
Sito Web
istranzos@hotmail.it
335.6027306