Locandina della mostra
© Nelly Dietzel/Sara Manca

Sa mustra “Quello lì”, personale de Francesco del Casino contivigiada dae Chiara Manca, dedicada a sa figura de Antoni Gramsci, aberit in MANCASPAZIO, in Nùgoro, chenàbura 19 de freàrgiu. Cun prus de chentu òperas, Francesco Del Casino torrat a propònnere s’immàgine de Antoni Gramsci chi abarrat in sa memòria cumpartzida: dae sos disinnos a sas telas pintadas a ògiu, a sos modellos de cartotza, a sas tzeràmicas, sena de su piessignu pop de s’immàgine, destruende-la e torrende-la a cumpònnere a manera picassiana.

Sa punna sua est sa de torrare unu corpus, sentidos e umanidade a su “rivolutzionàriu pro arte” Antoni Gramsci: dae sos primos disinnos, in ue pintat sa conca ebbia, a cussos in ue pintat sa conca e sas petorras, fintzas a lòmpere a sa figura intrea, un’òmine beru, chi si bufat su cafè e chi si fumat una sigareta, cando est iscriende, imboddiadu in un’isserpa manna.

Pro Francesco Del Casino, nàschidu in Siena ma pigadu a fìgiu de ànima dae sa Sardigna, Gramsci si faghet agiomai unu pensu chi pertocat ònnia cosa, chi s’artista li dèdicat unu produsimentu istremenadu e autònomu in sos ùrtimos annos.

Sa mustra “Quello lì”, chi chircat prus che totu a sos giòvanos, est in su pròpiu tempus un’espressada de acatamentu a su pensadore polìticu  e filòsofu sardu a 130 annos dae sa nàschida e a s’artista Francesco Del Casino, chi cun sos murales suos at piessignadu una bidda intrea de sa Sardigna de intro (Orgòsolo), contende, dae sos annos Setanta a oe, sos acontèssidos prus de importu de s’istòria reghente.

Sa mustra l’acumpàngiat unu catàlogu a duas limbas cun iscritos de Tomaso Montanari, Franca Zoccoli, Antonello Cuccu e Chiara Manca, progetu gràficu de Sara Manca, furriaduras in inglesu de Shahrazad Hassan e fotografias de Nelly Dietzel.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22

Organizzazione

MANCASPAZIO
Via della Pietà n.11, Nuoro
Sito Web
mancaspazio@gmail.com

Galleria fotografica

Documenti Allegati

• ,