© web

Gràtzias a sa resurtada bona chi at tentu cun su pùblicu, sa mustra fotogràfica “Abissi di silenzio – Immagini dal film Banditi a Orgosolo, Vittorio De Seta, 1961” contivigiada dae Antioco Floris e Antonello Zanda l’ant perlongada a su 31 de austu in su Museu de su Costùmene de Nùgoro.

In sa mustra si podet bìdere unu sèberu de immàgines de su film, fotogrammas e fotografias de iscena, chi piessignant s’istile de Vittorio De Seta, ma mustrant in sa carrera visiva finas sos elementos ischietos de sa Barbàgia de sos annos Chimbanta e Sessanta chi Banditi a Orgosolo cheret rapresentare.

Sa mustra, produida dae sa Sotziedade Umanitària – Cineteca Sarda movende dae unu progetu de chirca fatu dae su Dipartimentu de Lìteras, Limbas e Benes culturales de s’Universidade de Casteddu e promòvida paris cun s’Istitutu Superiore Regionale Etnogràficu e sa Fundatzione Sardigna, si podet bìere in Nùgoro, in su Museu de su Costùmene, in carrera Mereu, dae su 9 de trìulas a su 15 de austu. Pro intrare non si pagat nudda.

Cunforma a sa prima espositzione, sa de Nùgoro tenet in prus unu cuncordu nou, fatu paris cun Igrazio Figus, responsàbile de su setore audiovisuale de s’ISRE, in ue b’at immàgines in prus, materiales de repertòriu comente a sos manifestos originales de su film e unu documentàriu de Daniele Atzeni.

Sa mustra “Abissi di silenzio. Immagini dal film Banditi a Orgosolo, Vittorio De Seta, 1961” l’ant aprontada pro sos sessanta annos dae s’essida de su film Banditi a Orgosolo in sos tzìnemas e dae sa premiatzione sua in sa Mustra de su tzìnema de Venètzia, ma finas a deghe annos dae sa morte de su regista.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22