S’Istitutu cumprensivu San Donato de Tàtari, ghiadu dae sa dirigente dot.ra Patrizia Mercuri, e s’Assòtziu Montessori in Tzìrculu Sardigna, faghent a ischire de s’incarreru sàbadu 27 de freàrgiu de su primu cursu de sèberu didàticu Montessori pro maistros de s’Iscola primàrgia (550 oras) autorizadu dae su MIUR cun D.M. n. 48 de su 30/04/2008 e cun su coordinamentu iscientìficu de maistra Monia Aranci, formadora de s’Òpera Natzionale Montessori. S’Istitutu cumprensivu tataresu, ente gestore de su cursu, at traballadu cun s’Assòtziu Montessori in Tzìrculu Sardigna (assotziada a s’Òpera Natzionale Montessori, ente ùnicu acreditadu pro sa formatzione montessoriana dae su Ministeru de s’Istrutzione) pro chi su cursu s’esseret pòdidu fàghere in Tàtari, sende custu su logu in ue est nàschida sa prima setzione Montessori in un’iscola pùblica istatale in Sardigna. In sa realidade tataresa sas setziones Montessori de s’Iscola Fabrizio De Andrè, nàschidas time-time in su 2017, sunt favoressende annu cun annu unu cunvertimentu de s’iscola de su connotu, siat pro ite unos cantos maistros ant detzisu de s’iscrìere a su cursu de ispetzializatzione, siat pro ite ca sos logos e sas àulas dedicadas in s’iscola de bia de sos Grèmios sunt leende unu sètiu craru montessorianu. Dae su 2017 a su 2021 su nùmeru de sos dischentes montessorianos nch’est brincadu dae 15 a 128 iscritos, a s’imbesse de s’ismèngua chi amegat de connòschere sa populatzione de sos dischentes sardos e italianos. Custa crèschida est de importu a beru pro ite ca a palas b’at unu sèberu cabosu de sas famìllias, chi lis agradat custa manera de fàghere iscola.   A.I.G. Attività realizzata col contributo della Regione Sardegna – IMPRENTAS 2020-2021. LR 22/2018, art22