Pro ammentare a s’iscritora chi dae sese, comente a autodidata, aiat contadu a manera ispantosa sa Sardigna e sa gente sua, sa fèmina chi aiat segadu ònnia cunventzione sotziale iscriende a sa sola sa sorte sua, s’ISRE (Istitutu Superiore Regionale Etnogràficu), s’ente chi costoit sa Domo Museu in ue su Prèmiu Nobel fiat nàschida, a prus de medas manuscritos de Deledda, at tentu s’incàrrigu de incarrerare su cuncordu de su programma de tzelebratziones chi at a èssere ricu meda de addòbios, fintzas itinerantes.

Su programma de sas fainas istitutzionales at a comintzare giai dae s’agabbu de maju cun sa de ses editziones de IsReal – Fèstival de tzìnema de su reale (dae su 25 a su 30 de maju).

In su Fèstival – a manera misturada, in presèntzia e in lìnia – s’at a presentare in anteprima su film prodùsidu dae s’ISRE “Grazia Deledda sa rivolutzionària”, ghiadu dae Cecilia Mangini e Paolo Pisanelli. Sa projetzione si càrrigat de unu valore particulare, sende chi dae pagu tempus nos at lassadu custa grandu documentarista.

In sos meses imbenientes s’Isre tenet in programma unas cantas fainas chi punnant a nde fàghere essire a pìgiu sa fèmina chi nos faeddat, e ant a invitare a connòschere mègius a Grazia cun maneras diferentes de si ddoe acurtziare, cun projetziones de film, cun rapresentatziones teatrales e cuntzertos, mustras de documentos e òperas, àndalas sensoriales, fintzas cun addòbios de aprofundamentu de importu iscientìficu mannu.

A manera particulare s’Isre at a propònnere “Sas dies deleddianas”, cunvegnos, addòbios e certamen in limba italiana e sarda chi ant a contare s’universu de sas fèminas in sas òperas de Grazia Deledda, a ue b’ant a pigare parte espertos de sas universidades sardas, natzionales e istràngias, intelletuales e istudiosos de su mundu de sa cultura, professores e dischentes.

a.i.g

Attività realizzata col contributo della Regione Sardegna – IMPRENTAS 2020-2021. LR 22/2018, art22