© .

Non si firmat s’ispèddiu pro sos libros bellos, pro sos addòbios cun iscritores de totu su mundu e pro sos resonamentos paris cun su pùblicu in contu de sas chistiones diferentes cussigiadas dae sa literadura. Prus che totu a pustis de un’annu che a cussu apenas coladu.

Est pro cussu chi cun presu mannu torrat in sos nastros de mòvida Éntula – fèstival literàriu ispartu in Sardigna, s’apuntamentu de s’assòtziu Lìberos chi dae su 2012 faghet fortza paris cun iscritores e pùblicu in sos logos prus ammajadores e acoliosos de totu s’ìsula.

Sa de noe editziones puru, chi cumentzat in abrile e at a sighire pro totu s’annu fintzas a su mese de nadale, si previdet a manera ammisturada: mancari cumentzet in lìnia, s’idea e s’ispera est de pònnere cantos prus apuntamentos in presèntzia in sos meses de s’istadiale, pro pòdere gosare de su totu de sos piessignos de su fèstival.

S’EDITZIONE 2021

Protagonistas de Éntula 2021 ant a èssere una trintina de autores de su panorama sardu, natzionale e èsteru e sos traballos ùrtimos issoro, unos cantos publicados dae pagu tempus, àteros chi los ant a publicare in sos meses imbenientes.

Isetu mannu pro Sandro Veronesi, duas bortas Prèmiu Strega, pro Donatella Di Pietrantonio, pro su cassadore de acuilones sirianu Zeyn Joukhadar, pro su diretore de su Salone internatzionale de su libru de Torinu Nicola Lagioia, pro Nadeesha Uyangoda impinnada dae semper in is chistiones de s’identidade.

E unas trintina sunt sas biddas chi pro como sunt cunfirmadas in custu biàgiu crispu dae una parte a s’àtera de sa Sardigna, cun sa punna a un’ala de iscobèrrere sa richesa culturale e de su paesàgiu de sas biddigheddas sardas, a s’àtera ala de dare cun su fèstival un’oferta in atzunta pro su turismu: a prus de sas istòricas Fonne, Fordongianus, Turri e Codaruina, b’ant a èssere Casteddu, Macumere, Monteleone, Nujvi, Nùgoro, Aristanis, Piaghe, Portu Turre, Sarule, Tàtari, Serri, s’Unione de sos Comunes de sa Barbàgia e Biddanoa de Forru, a prus de tres intradas noas chi sunt Baunei, Orthullè e Biddamanna Strisàili.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22