Un’istatuedda de brunzu intrea, cosa rara a l’agatare in una campànnia de iscavu, chi mustrat a unu gherreri bestidu cun sas ragas, un’elmu corrudu e a pilos longos intritzados chi dae suta de s’elmu lompent fintzas a su tzugru. In petorras unu pugnale a màniga gammada, sinnale chi fiat lòmpidu a s’edade adulta, cun sa manu manca apoderat un’istocu arrimadu in su coddu, chi portat acapiadu un’iscudu tundu cun una punta e disìnnios a rajos, a cambas abertas, chi movent dae unu de sos canales de s’iscagiadura, chi serbiat pro lu cuncordare in una tauledda votiva.

S’iscoberta istravanada l’ant fata in su logu archeològicu de Cuccuru Mudeju, in sartu de Nughedu, in provìntzia de Tàtari, in sa Sardigna nord-otzidentale.

Sunt medas is repertos de brunzu chi ant cunsignadu a su Tzentru de acontzu de sa Subrintendèntzia pro los acontzare, analizare e fotografare. Unu cantigheddu de ispada votiva, un’agùgia, unu pugnale a fògias cun una puntzighedda, un’àteru cantigheddu de pugnale, un’aneddu de brunzu, unu cantigheddu de brunzu figuradu chi mustrat una parte de un’arcu e s’acapiadura sua.

Sos resurtados de sa campànnia de iscavu e de acontzu cunfirmant s’importu de su santuàriu e mustrant sos resurtados bonos otentos dae su Comune e dae sa Subrintendèntzia. Sos repertos, a manera particulare sas tàulas pro sas ofertas e sas istatueddas de brunzu, faghent cumprèndere sa religiosidade nuraghesa de su Brunzu de agabbu e de su cumentzu de s’edade de su Ferru. Sos iscavos betzos nd’aiant fatu essire a pìgiu su rastru de unos cantos fràigos, chi agiomai non si bidiant prus e chi como si torrant a ischerare bene, gràtzias a custos ùrtimos traballos.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22