Impignu mannu, in Neoneli, pro “Wine, Frègula e Cassola“, s’addòbiu enogastronòmicu cuncordadu dae su Comune pro avalorare s’immàgine de sa bidda de Barigadu cun sos prodùsidos de su logu. Un’apuntamentu chi pro ocannu ebbia, a manera etzetzionale, si faghet in santandria, ma chi giai dae ocannu chi benit s’at a fàghere torra che a semper in sas primas dies de santugaine. Sàbadu 20 e domìnigu 21 sa bidda de Barigadu at a acasagiare a sos bisitadores in sos bighinados antigos pro nche passare una coa de chida mandighende bene e ispassiende-si: non b’at a àere binu de calidade e màndigos bonos ebbia, ma fintzas addòbios culturales chi ant a piessignare su programma ricu de custas duas dies.

Sa frègula, sa pasta de sìmula de trigu tostu de sa coghina sarda, at a èssere grandu protagonista domìnigu 21, cando in pratza de Barigadu b’at a àere duos addòbios chi non podent mancare in s’apuntamentu de atòngiu in Neoneli: a sas deghe cumentzat sa Fregulada, sa gara de coghina cun ses coghineris chi s’ant a fateriare aprontende màndigos originales cun frègula; a pustis, a sa una, su pràngiu cun sos duos màndigos nòdidos de sa coghina de su logu, est a nàrrere sa frègula istuvada e sa cassola.

Neoneli ocannu puru est una de sas tapas de Monumentos abertos, sa manifestatzione dedicada a su promovimentu e a s’avaloramentu de sos benes culturales de s’ìsula. E gasi, sos primos impignos in agenda pro sa die de sàbadu sunt sas bìsitas ghiadas a unos cantos logos de importu de su territòriu, chi faghent parte de su programma de Monumentos abertos: dae sas deghe de mangianu a sas ses de merie s’at a pòdere bisitare sa crèsia de s’Ànghelu, sa crèsia de sartu de su de deghessete sèculos chi s’agatat a unos tres chilòmetros dae sa bidda, s’Òasi pro animales de Assai e sos “arcivos”, sos impiantos enològicos antigos de cussos logos, fràigos a bator lados fatos cun muros a bullu, chi serbiant pro bi pònnere s’àghina in antis de la catzigare.

Su matessi programma si torrat a fàghere fintzas sa die in fatu, domìnigu 21, cun sos matessi oràrios.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22