Italia Eventi 24
LinguaIT
Canta passièntzia podet tènnere ancora sa cultura nostra?
Pro cantu ancora podimus suportare de bìere sas traditziones proibidas?

Comente s’annu passadu.
Mudìmene in sas carreras.
Sa gente in sas domos, fogu allutu, ma no est su folghilone.
Sant’Antoni de su fogu non b’est. E non bi sunt mancu sas màscaras.
Carreras bòidas. Silèntziu.
B’est su COVID.
Tocat a tènnere passièntzia.
Ma canta passièntzia podet tènnere ancora sa cultura nostra.
Pro cantu ancora podimus suportare de bìere sas traditziones proibidas.

No est ca no ischimus ca b’est su perìgulu, no est ca no ischimus ca custa maladia at fatu giai dannu meda e nde podet torrare a fàghere. Dd’ischimus, totus.
Ma pro ite s’agatat semper, e si faghet totu su possìbile pro agatare solutziones pro istàdios, teatros, ispetàculos de dònnia manera e pro sa traditzione, pro su fundamentu de sas comunidades nostras, non si resèsset a agatare unu modu pro las onorare?

Sa domanda chi nos faghimus est solu custa.
Su carrasegare est in Sardigna unu momentu de unione de sas biddas, una manera pro torrare a cumintzare.
Podet mai èssere beru chi sa bessida de sos Mamutones o de sos Boes siet prus perigulosa de sa curva nord?
Podet èssere beru chi a bestire su Componidori siet prus perigulosu de unu cuntzertu in unu teatru casteddaiu?
Podet mai èssere beru chi unu ballu tundu intro de 80 personas siet prus perigulosu de unu cunvegnu o de unu atòbiu polìticu?
Nois non podimus torrare respostas seguras ma una cosa la podimus nàrrere.
Est gana chi bi cheret. Sa voluntade. Nos torrat a memòria cantas bortas s’istadu est abarradu atesu dae sa cultura nostra, cantas bortas sa burocratzia prus frita no est resurtada a cumprèndere pro chie e pro ite b’est.

Tando, su nostru est solu unu giornale. Nois contamus festas, bellesa e ispantu, nois de Sardegnaeventi24.it semus solu testimòngios.
Ma si est a contare sa realidade, si est a contare su chi bidimus, non podimus fàghere finta de nudda, non podimus abarrare mudos ananti de sos sèberos tzrupos de chie ischit fàghere bene meda sos contos a brente prena, de chie serrat e istudat sena de ischire nudda.
Bos naramus ca sas istitutziones sunt arende una terra chi non connoschent. E su sèmene chi sunt pastinende non at a bogare frutu bellu. Ca sa terra cheret istimada e su frutu cheret atèndiu.
Bogende sa gente de sa cultura issoro sena bi pessare tropu at a marcare de prus ancora una làcana cun chie detzidet.
Una sotziedade chi non podet onorare su chi est s’at a segare in fìnfiris comente una ampulla chi ruet a terra, in milli cantos. Comente no at a èssere fàtzile a pònnere paris sos cantos de s’ampulla no at a èssere fàtzile a torrare a fraigare sa sotziedade.
S’ispera est chi chie detzidet lu cumprendat como, non cras.

SardegnaEventi24.it

SardegnaEventi24.it

2066 eventi pubblicati

676 notizie pubblicate

0 aziende pubblicate

# Altre Notizie

  • Facebook
  • Instagram
  • Twitter
  • Google+
  • Youtube
  • Feed

TERRA DE PUNT SRL P.IVA 03794090922

Numero REA: 298042 - Iscrizione ROC: n. 32207

SARDEGNAEVENTI24 è una testata giornalistica registrata presso il tribunale di Sassari n. 1/2018

Sede Legale: Via Anglona 7, 09121 Cagliari

Sede Operativa: Viale Trento 15, 09123 Cagliari

X
en Englishfr Françaisde Deutschit Italianopt Portuguêses Español