Amus detzisu de provare a elencare carchi règula chi diat pòdere fàghere sa Pasca de Nadale praghile.

Mudare sa domo nostra nos faghet intèndere de prus sa maia de sa Pasca de Nadale e dat  armonia e paghe cun s’ambiente nostru, però tocat de dare atentu a non fàghere a rìere e a no esagerare ca ingendrat confusione meda e calicunu est capatzu chi non lu cumprendat. Istile delicadu e armoniosu pro gosare de sas dies de festa comente paràula de òrdine!

In custas dies de festa podides fàghere traballos creativos pro decorare sos donos de Nadale de boisàteros fatos a manera personalizada, pro mudare sa domo, pro fàghere durches e decoros pro sa mesa bostra comente un’ispidientu chi bos distraet dae s’istress de ogni die.

Bortas meda cumbintos chi prus s’ispendet e prus bella figura si faghet, si faghent donos chi costant meda e chi in ùrtimu non sunt mancu apretziados comente diat dèvere èssere e su borsellinu nostru nde sufrit. Totu custu non nos allegrat in sa chirca de su donu ne aprontende su pacu personalizadu pro sos chi istimamus, ma batit ànsia meda e no est prus unu praghere.

A si leare unu pagu de tempus ognunu pro isse matessi, a si firmare pro cumprèndere a livellu ispirituale su valore beru de custa festividade istimada e isetada meda in totu su mundu, podet fàghere bene ebbia. Non pensare a livellu materiale ebbia ite podet dare custa festa, ma destinare unu pagu de tempus in sa die pro agatare ognunu a isse matessi a livellu personale e ispirituale.

Ammentade chi podides aparitzare una mesa cun paritzas cosas bonas ma sena esagerare, pro no isperditziare o pro non s’intèndere in curpa pro àere mandigadu tropu.

At a pàrrere iscontadu, ma prus a prus in su tempus de sas festas de Nadale est de importu mannu a illangigare faghende isport, siat pro sas emotziones chi aumentant e siat ca si punnat a mandigare prus de su chi bisòngiat. Non pro fortza tocat de fàghere chissai ite cosa, bastat fintzas una passigiada in s’oru de mare o in su sartu.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22