Su casteddu de Acuafrida est una testimonia de importu de fràigu afortigadu de s’Edade de mesu, s’agatat in Silìcua, in su Sud de sa Sardigna, a unos 30 km dae Casteddu. Est subra de unu montigru de orìgine vulcànica, a 256 metros de artària cunforma a su livellu de su mare. Su logu chi ddi narant “Domo Andesitico de Acuafrida” sa Regione Sardigna dd’at fatu Monumentu naturale. Dae s’agatada de unu documentu de su paba cun data 30 de trìulas de su 1238, si pensat chi su casteddu s’agataiat giai in cussa simana, ma a parre de medas dd’aiat fatu fraigare su nòbile pisanu Ugolino Della Gherardesca, conte de Donoratico cumentzende dae su 1257, annu chi si fiat fatu Donnu de sa parte sud-otzidentale de sa Sardigna a pustis chi fiat isparèssidu su Giuigadu de Casteddu. Rutu in disgràtzia, a su conte l’aiant impresonadu in Pisa in sa turre de sos Gualandi, chi a pustis l’aiant postu “Turre de su fàmene”, in ue fiat mortu in su 1288.

Sa fortilesa est partzida in tres partes: su burgu, sa turre chisterra e su casteddu. Su burgu fiat sa parte prus bassa de totu su fràigu e b’aiat una filera de domigheddas pro acasagiare a tzeracos, tropas, istaddas e magasinos. Sa defensa fiat una muralla a dentes, longa unos 80 metros, in ue si sunt agatados rastros de bator turres e de sa caminera de runda. In su burgu b’ant agatadu fintzas una chisterra, cun bòveda a cuba fata cun matoneddos.

A 256 m de artària b’est su casteddu, oe bastante derrutu mancari b’apant fatu unos cantos interventos de acontzu. De sa turre manna no abarrat nudda, mentras abarrat sa turre de miramentu, chi s’agatat unu pagheddu prus in bassu cunforma a s’intrada.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22