Sas festas de Nadale sunt acostende. Sos sonos, sos colores e sos nuscos de sa Pasca de Nadale sunt in s’aera. Ma cantu est abarradu de de sas traditziones nostras? In cantos logos amus a intèndere “Note de chelu” o “Naschid’est” ? Su mainstream de sa globalizatziones est ingullende totu. Paris cun sa limba morint usos e costumes, maneras de festare a de abarrare paris. Lughes, sonos e nuscos de aterue sunt intrende in totu sas domos e mancari chi pessemus de èssere lìberos in sos issèberos nostros nos agatamus a nos cumportare comente nos proponet sa cultura de massa. Non nos agatamus ca semus ammesedados a traditziones noas, istrecados dae modellos angenos chi nos tragant che frùmene a mare. E issaras ita est a fàghere, comente podimus isperare de salvare su mundu nostru, pondendelu a intro de un’àndala chi, mancari prus manna, non si nche papet totu? No est fàtzile. Ma una manera si podet agatare. Meda cumintzat dae sa limba, cussa prenda dorada chi est mancande a suta de sa mata de natale nostra, ma sighit cun sos màndigos sardos, cun sas maneras de festare chi amus acostumadu in su passadu. In fines diat a tocare de non si fàghere illuniare dae Babbo Natale a brente de Coca Cola e provare a pensare ca pròpriu sas festas sunt cussas ocasiones raras chi nos reunint comente famìllias, comente comunidades in sinu a una identidade chi est nostra e on bi podet èssere publitzidade chi dda mudet. T.C. Attività realizzata col contributo della Regione Sardegna – IMPRENTAS 2020-2021. LR 22/2018, art22