Is Launeddas sunt unu istrumentu musicale sardu a sulidu est a nàrrere unu aeròfonu, totu sos istrumentos chi sonant cun s’agiudu de s’àghera, ma prus a distintu si podet insertare in sa famìlia de sos clarinetos, ca tenet gasi comente a custos unu linguatzu cun una lamella feti.
Prus a notu is Launeddas sunt unu istrumentu fatu de tres partes cilìndricas de mannària diferente creadas dae cannas simples de riu.
Sa prus longa est su Tumbu chi non tenet istampos e est sa parte de su bassu de s’istrumentu cun una longària chi nche podet lòmpere fintzas a unu metro.
Sas àteras cannas si mutint Mancosa e Mancosedda, sunt ambas istampadas e donant sa tonalidade chi distinghet a sas launeddas.
In totu e tres sas cannas de s’istrumentu s’agatat sa Cabitzina chi tenet su linguatzu cun una lamela bogada dae sa canna etotu e regulada cun sa chera de abe.
Su piessinnu de is launeddas est sa manera de las sonare, difatis in prus de imparare a origra sos sonos, tocat de imparare a sonare a sulidu sighidu cha faghent unu sonu sena sessare mai e duncas su sonadore non si podet firmare pro alidare. Su sonadore nche tirat s’àghera, faghende-la colare in sos purmones pro la sulare cun sa buca arreu arreu. In antis de imparare a sonare is launeddas, tocat de bi provare meses cun meses petzi cun sa cabitzina in buca sonende a sighidu e si bos at a capitare de bìere a carchi pipiu chi camminat in sa bia boghende unu sonu arreu, est a seguruunu pipiu chi est istudiende pro imparare a sonare is launeddas.
Petzi a pustis imparadu bene sa tècnica de su sulidu sighidu, su maistru at a insinnare a bi pònnere sos pòddighes in sas cannas istampadas ammentende petzi a origra sos sonos chi nche depet bogare.
AIG
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
