Iscrìere in limba non est cosa de nudda

Iscrìere in limba non est cosa de nudda. No esseret ca toccat a istare atentos a règulas “foneticas”, tocat a chircare a mente paràgulas, sas prus zustas, po s’argumentu chi si leada. Ma est atera s’allega: iscrìere in Limba cheret narrere, oe, a nche torrare s’argumentu dae s’italianu. Non resessimos prus a “pessare in Limba”. Sos prus ant a narrere chi s’importu est a chistionare in sardu, no a l’iscrìere. Ma una paragula prima andat pessada e poi nada. E cando s’iscriet si prestat prus attentzione dae cando si faeddada. Sa pregunta est una: dae cando amos aggabau de pessare in sardu? In su 1922, Giovanni Gentile (ministru de s’istrutzione), aiat chèrfiu chi po s’iscola elementare, b’esserent libros chi esserent trattau s’istòria, sa cultura e sa limba de sas regiones italianas. In Sardigna: “Sardegna-Almanacco per ragazzi” de Pantaleo Ledda. Sa cosa no est durada meda. Dae su ’30 su Fascismu chircat in d’onzi ghetu de nche cantzellare onzi “cultura regionale”, po chi b’esseret solu cussa italiana. Semper in cussos annos negat chi s’esseret usau e faeddau su Sardu. Sos pitzinnos costrintos a istudiare poesias de Pascoli, de Carducci e àteros italianos. In iscola tocaiat a chistionare s’italianu. Sovente su resultau fiat unu “italianu porcheddinu”, chi non fiat italianu e non fiat Sardu. Ma su chi no at pòtziu su Fascismu l’at pòtziu sa televisione italiana, s’Istruzione pubblica (chene mentovu mai in sos libros de iscola de istòria e cultura e Limba sarda) e sos sardos “novos”, modernos e istriuidos: cussos chi chi ant pèrdiu memòria e dignidade. Chi zai, si non pessàmos in Limba, timo chi cherzat nàrrere chi nche amos pèrdiu fintzas su naturale de èssere sardos. Istranzos in domo nostra. M.B. Attività realizzata col contributo della Regione Sardegna – IMPRENTAS 2020-2021. LR 22/2018, art22