Punk-autoriale est s’ùrtimu discu de Igor Lampis, sonadori, autori e fintzas editori, chi est bessiu a s’acabu de ocannu passau. Custu traballu, chi s’agatat in vinili sceti ma cun aintru unu link po ndi scarrigai totu is cantzonis, est bessiu in 200 còpias numeradas e pinnigat apari duas partis de su tretu musicali de s’artista de Pabillonis. Difatis sa carriera sua est inghitzada pròpiu cun su punk e sa truma stòrica de is Punkillonis, chi funt sonendi prus de 20 annus, e est sighendi cun sa cantzoni de autori. In custu traballu nou ddui agataus ancora calincuna cantzoni prus rock e punk e finas atras chi andant prus a bellu e de amori puru, cumenti a I tramonti, Voglio amarti e Parlo poco. Is fueddus no chistionant sceti de amori pero’ ma de atrus temas puru, sa banalidadi de sa vida, su feli contras a una sotziedadi bamba chi ponit infatu a dònnia moda, po arribai a is ùrtimus tempus de inserru e acorramentu in domu. No nc’amancat nimancu su spàssiu cun Valzer punk, Con te, Sulla piazza po ndi nomenai calincuna. Medas funt is òspitis, Dandy Bestia (Skiantos), Beppe Chierici, Mireille Safa, Quilo, Pasquale Posadinu e unu biaxi de atrus artistas sardus. No est su primu discu a solu de Lampis, chi fiat giai bessiu unus cantu annus a oi cun Nuovo Cantacronache 4, unu traballu chi fait parti a s’arregorta Nuovo Cantacronache, chi torrat a pigai s’idea de su primu Cantacronache stòricu e chi at pubricau s’editori sardu Cenacolo di Ares. S’autori at scritu una bella pariga de lìburus puru, de poesias e de contus, curtzus e longus. S’ùrtimu est Non è la fine del mondo, sèmpiri po su pròpiu editori, ca Igor, a prus de totu s’atru, est finas su diretori editoriali de su Cenacolo di Ares e no pùbricat sceti is suus de lìburus ma finas allenus e discus puru, sardus e foresus. T.C. Attività realizzata col contributo della Regione Sardegna – IMPRENTAS 2020-2021. LR 22/2018, art22