A pustis de sa firmada acapiada a sa pandemia, sàbadu 13 de onniasantu si torrat a fàghere in su mercadu tzìvicu betzu de Tàtari Wine&Life, sa manifestatzione cuncordada dae s’assòtziu de promovimentu sotziale chi tenet su pròpiu nùmene, paris cun s’assòtziu universitàriu ESN Tàtari e agiudada dae su Comune de Tàtari, dedicada a sos produsimentos vitivinìculos de calidade. S’ischema de programma movet dae sas esperièntzias de sos addòbios de importu chi pertocant su binu in su territòriu natzionale, e a pustis l’ant isvilupadu a mesura de Sardigna cun una programmatzione de binti annos partzida a chimbe annos a chimbe annos. Sa punna est de si fàghere unu logu de riferimentu, in antis regionale e a pustis de totu s’àrea mediterrànea, pro su setore e pro totu su chi s’agatat a inghìriu, dae sos produsidores e isparghidores a sos ristoradores e consumadores, portende cosas de importu chi andant bene fintzas pro unu pùblicu mannu. Cunforma a sa prima editzione de su 2019. ocannu b’ant pigadu parte su dòpiu de is cantinas, chi dae 25 sunt lòmpidas a 50. Sa punna est sa de lòmpere a intro de sas tres editziones imbenientes a 100 produsidores isulanos a prus de cuddos natzionales e internatzionales e de interessare fintzas a 10mìgia persones.   Custa editzione de su 2021, chi est sa de duas, at a tènnere che a fundamentu cuddos piessignos de calidade e de importu chi giai ant fatu a manera chi s’esseret seberada e chi l’aerent apretziada in su 2019, cun unas cantas novas istudiadas in custos 12 meses a manos de pare cun sos cumpetentes e espertos de custu setore. Comente a semper, sa manifestatzione s’at a partzire in duos momentos seberados ma acapiados a pare a istrintu: su primu, cussu de su cungressu in sa sala Angioy de su Palàtziu de sa Provìntzia, dae sas tres a sas ses de sero, pro frunire connoschèntzias, ainas e prataformas de cunfrontu a sos produsidores e a sos cumpetentes e espertos de custu setore; su de duos est cussu de sa tastadura in su mercadu tzìvicu betzu dae sas ses e mesa de sero a mesunote, pro torrare a pensare in sa carrera culturale e de su sèberu cale sunt sas tastaduras mègius pro su consumadore.   A.I.G. Attività realizzata col contributo della Regione Sardegna – IMPRENTAS 2020-2021. LR 22/2018, art22