Sandru Dessì est unu maistu de scola apassionau de fumetus. Nàsciu in Casteddu ma armungesu de arratza, at sèmpiri bìviu in bidda incumentzendi a pintai a solu, faendi de maistu a issu etotu e imperendi tènnicas diferentis. Candu a mannu at studiau in s’Universidadi e agoa at incumentzau a traballai in sa scola, at cumprèndiu ca su fumetu tenit unu grandu poderi didàticu, de imparu po is giòvunus e po is prus matucheddus puru. E difatis, postu s’est a traballai po ndi bogai a pillu paricis pubricatzionis chi no benit a beni a ddas nomenai totus. Tra is tantis podeus arregordai, Maistos, po sa Regioni sarda, Su Sirboni de s’Aremigu (Condaghes), furriadura in sardu e a fumentus de Il Cinghiale del diavolo de Emìliu Lussu, Su Segretu (Iskra), Emilio Lussu: la vita e il pensiero (Delfino) e unu progetu de tres volùminis po Antoni Gramsci (Iskra).

S’ùrtima faina sua est Il dono di Natale (Iskra) de Gràtzia Deledda. At aprontau cuncursus a fumetus, at pubricau in arregortas cun atrus autoris e est sighendi a pintai, a fai e afateriai. Cumenti podeis ligi de is tìtulus, ma nd’amancat puru, is lìburus funt in sardu e finas in italianu, e is nòminis chi torrant de prus funt is de Lussu e de Gramsci, duas passionis mannas de Sandru. Ca Lussu fiat de Armùngia, e issu est de Armùngia e duncas de domu etotu, dd’eus a nai.

Medas funt is volùminis dedicaus a issu e aturetantis funt is chi at pubricau po Gramsci. Gramsci no tenit abisòngiu de ddu presentai meda meda, ca est su pensadori sardu prus mannu, su prus connotu e prus studiau in su mundu, esempru de coerèntzia, onestadi intelletuali e profundidadi de ideas. A prus de totu custu, Sandru est sèmpiri a giru peri su logu cun festival e atòbius, e est sighendi a pintai personalidadis sardas, de Oresti Pili fintzas a Tziu Antoni Cuccu.

T.C.

Attività realizzata col contributo della Regione Sardegna – IMPRENTAS 2020-2021. LR 22/2018, art22