Unu de sos tretos de sa costera prus de importu de custos chirros de Santu Diadoru est a seguru sa Punta Molara. Una borta arribbados a s’acabbu de sa bidda, in campàgna, si podet mascare in Via Lu Pitrali e, sighende cara a ovest, s’at a arribbare a sa Punta. Est una terratza ispantosa chi s’acarat in su mare, a in antis de una mirada galana cara a s’ìsula de Tavolara.
S’istrada de fàghere est bastante in pigada, ma nde b’at su tantu de la sighire pro castiare unu paesàgiu distintu, tìpicu de su mediterràneu, ricu de rocas de granitu e de mata mediterrànea.
Su tretu, ue dòminat Punta Montepitrosu, tenet unu patrimòniu naturalìsticu chi tocat de bìere e chi sos turistas aprètziant cada annu chi benint a colare sas vacàntzias in cue in Sardigna.
Dae sa chima de sa Punta Molara s’at a pòdere castiare fintzas unu panorama ispantosu a pitzu de bona parte de su parcu marinu, barighende su lodu fintzas a lòmpere a sos montes de sa Costa Smeralda a est, e a Monte Limbara serente a Tèmpiu a ovest. Dae sa fratzione Lu Fraili, posta in intro de sa bidda de Santu Diadoru si podet sighire una caminera colovrina, ma panoràmica meda, chi nche giughet a sas villetas bellas de pedra de Lu Fraili di Sopra, in mesu de sa mata mediterrànea.
Dae cue, s’istrada sighit fintzas a lòmpere a su cùcuru de su Colle di Altora, de belle 340 metros dae ue s’at a pòdere castiare unu paesàgiu ispantosu chi dòminat su pranu de L’Alzoni in sa Laguna de Santu Diadoru, sas Calas Brandinchi e Codacavallo fintzas a sas ìsulas Tavolara e Molara. Colende sas paritzas camineras de su Colle di Altora serente a sas fratziones de Vaccileddi,deretu a pustis de Montipitrosu s’ant a pòdere castiare paritzos esemplares de fàuna areste e lòmpere a camineras ispantosas indurriadas dae istatzos betzos ue istat galu gente, traineddos e tupas de lidone.
AIG
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
