Giustu in su sud-est de sa parte prus estrema de Gaddura costerina si podet bisitare su monte granìticu Monte Nieddu ue s’agatant unu muntone de matas de longufresu e de ghinnìpere. A dolu mannu, in sos primos annos de su de XX sèculos, Lu Monti, comente lu mutit sa populatzione diodorina, est istadu pro bona parte segadu dae sos mastro de buscu istràngios chi l’ant privadu de su mantu vegetale ispantosu suo.
Fintzas sos fogos, posca, ant sighidu a fàghere dannu, privende-lu de unos cantos tretos disptintos. De cada manera, oe, fintzas si cun dificultade, su monte est torrende a s’abbivare cun cugiones de incantu e baddes cun trainos lìmpios e ispèndulas e terratzas panoràmicas chi s’acarant in su mare de Tavolara e Molara fintzas a sas Bucas de Bonifàciu.
Fintzas dae sa Punta Capo Codacavallo posca si podet castiare sa bellesa ispantosa de sos logos, paris a cussa geomorfològica, biològica e ambientale de su territòriu. Sa mirada cara a su parcu est ampra meda:tra sas ispècies de prantas che a su modditzi, su ghinnìpere, su lidone, sa murta, su mudegru e s’ogiastru, in intro de ue bi sunt unu muntone de ispècies faunìsticas comente a su sirbone, su lèpore, s’arritzone, su margiane, s’astore, su cucumiao e s’istria, bi sunt rocas de granitu galanas in colore rosa craru chi sunt s’ossamenta de su territòriu. Sas ìsulas de Tavolara e Molara, posca, tenent unu incantu mannu. Tavolara la mutiant sos romanos Hermaea e si nche pesat manniosa dae su mare cun sas rocas calcàreas suas in colore biancastru, sas falèsias artas e sas grutas cuadas.
Una de sas esperièntzias chi non si podent ismentigare pro totu sos turistas est a seguru sa bìsita de s’ìsula in barca, dae ue s’at a pòdere castiare su perfilu longu e afiladu de sas rocas suas paris a unos cantos paesàgios marinos prus de ispantu. Una gruta mescamente, cussa de su papa, meresset chi si bìsitet; in subra b’at una falèsia calcàrea chi nde ruet cara a su mare, sa Punta de su papa chi, cunforma a sa traditzione, diat rapresentare su Papa Ponziano, mandadu in esìliu in Molara in su 235 p.C. pro voluntade de s’imperadore Massimino su Trace.
AIG
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
