Una nova bella pro su territòriu sardu e pro su turismu, a prus a prus pro cussu sustenìbile.

A pustis de su caminu longu de acreditamentu internatzionale, su Parcu Natzionale de s’Asinara otenet su reconnoschimentu de importu de sa Carta Europea de su turismu sustenìbile de sas àreas amparadas paris cun àteras 7 realidades europeas, intrende a manera ufitziale a fàghere parte de sa federatzione pan-europea Europarc. Si sa situatzione epidemiològica de sa Covid-19 l’ant a permìtere, at a pigare parte a sa tzerimònia de cunsigna de su Diploma su 1 de trìulas de su 2021 in Sabugal, in Portogallu, a intro de su Ects Network Meeting imbeniente.

Unu caminu fatu paris cun su Ministeru de su Tramudu Ecològicu, chi at finantziadu totu sas fainas de acreditamentu, e cun sa Federatzione Italiana de sos Parcos. Ma a su caminu de tzertificatzione b’ant leadu parte, in prus, sos Comunes de Portu Turre, Istintinu e Casteddu Sardu.

A dies de oe sa retza Europarc Cets interessat 37 paisos chi rapresentant mìgias e mìgias àreas amparadas e logos Natura 2000. Sas organizatziones aunidas in sa federatzione gestint in totu prus de trinta milliones de ètaros chi faghent parte de sa Retza Natura 2000 (su 40 % de sa mannària de totu sa retza) e sa CETS est sa tzertificatzione prus de importu pro sa calidade de sa gestione. Est una tzertificatzione de protzessu, chi iscumproat s’agabbu de unu caminu de partetzipatzione e cun custu un’istrategia territoriale cumpartzida pro su turismu sustenìbile.

Unu sèberu fatu dae s’Ente, dae sos operadores econòmicos e dae sas amministratziones locales, comente a Portu Turre, Istintinu e Casteddu Sardu, cun una gestione ativa de sa sustenibilidade in sa carrera de su turismu, averiguadu dae un’ente esternu indipendente comente est s’EUROPARC.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22