Tàtari afòrtigat sas difesas contras de s’isparghidura de sa Covid-19. In sa coa de chida sa Politzia locale at fatu prus controllos meda in sos locales de sa tzitade: in prus de setanta locales sas guàrdias si sunt asseguradas chi esserent respetadas sas règulas e a manera particulare cussas pro parare fronte a sa pandemia.  In Tàtari puru in custas ùrtimas dies est crèschidu meda su nùmeru de sos chi nd’ant piscadu su virus: oe sos positivos residentes in tzitade sunt 79, sunt 26 in prus de chenàbura, e 7 sunt sos ricoverados; una chida a como sos positivos fiant 34 e 4 sos ricoverados.

Sunt medas sas atividades chi ant mustradu atentu pro sas règulas e respetu pro sa comunidade, ma sas guàrdias ant registradu fintzas carchi mancàntzia, dae bia Itàlia a bia Trieste, dae bia Volontè a pratza de sos Mortos in su Traballu, fintzas a lòmpere a Li Punti. Sas contraventziones chi ant postu sunt totus pro denùntzias fatas pro no àere respetadu sas règulas – custu faghet a bìere cantu in Tàtari siat manna sa sensibilidade e s’atentzione generale contras de su Coronavirus – mandadas a sa Caserma de bia Carlo Felice dae sos tzitadinos matessi e dae unos cantos assòtzios de categoria. Intra de sas mancàntzias denuntziadas, resurtat su de non àere domandadu su tzertificadu birde e su de àere retzidu prus clientes cunforma a su nùmeru prevìdidu pro parare fronte a s’isparghidura de su virus.

Pròpiu pro no àere respetadu sas normas contras de sa Covid-19, intra de chenàbura a mangianu e sàbadu ant postu sa multa a duos tzilleris: a un’ofelleria connota e a unu tzilleri, in ue non controllaiant su tzertificadu birde a sos clientes, e in duos locales pro festas abusivas e atropèllios de gente. Unu tzilleri puru in sa periferia de sa tzitade, chi s’autoridade giuditziària l’aiat giai issucutadu a manera preventiva, at peoradu sa cunditzione sua ca fiat ancora abertu a s’ora chi depiat èssere serradu e como nd’at a pagare sas penas.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22