Unu donu de importu, sinnu de una sensibilidade chi creschet e comintzu de un’àndala noa. In sa biblioteca comunale s’at a pòdere lèghere sa Carta de Logu in còdighe Braille gràtzias a s’Unione italiana de sos tzurpos e de sos chi bient pagu Onlus-APS, setzione de Tàtari (Uicss), chi l’at donada a s’Amministratzione. Sa tzerimònia ufitziale l’ant fata custu mangianu, 6 de santugaine, in sa sa sala de su Consìgiu de su Palàtziu ducale, presentes su sìndigu Nanni Campus, su presidente de su consìgiu Maurilio Murru, s’assessore de sa Cultura e de sas Oportunidades che a pare Niccolò Lucchi Clemente, sa dirigente Chiara Seazzu e su presidente de s’Onlus Francesco Santoro.

Est su primu libru in còdighe Braille chi s’agatat in su patrimòniu comunale. Un’àteru passu de unu caminu generale de inclusione sotziale incarreradu dae s’Amministratzione comunale, sensìbile meda a custu tema. Sa Carta de Logu l’ant partzida in bator volùmenes (sunt 600 pàginas in totu), pro fàghere a manera de la pòdere lèghere cun prus discansu; tocat de ammentare, difatis, chi su raportu intra de nieddu/Braille est de 1:2 o 1:3.

S’Imprentadora regionale Braille de sa Setzione territoriale de Tàtari, annoada in su 2020 cun machinàrios noos, si podet bantare de àere imprentadu in baranta annos libros de ònnia genia, pro sas iscolas de ònnia òrdine e gradu, libros literàrios, acadèmicos e ispetzialìsticos.

Sa lìnia editoriale de su 2021 s’est ismanniada cun su produsimentu de literadura sarda antiga e moderna e cun libros giurìdicos che a sa Carta de Logu.

De s’iscritu originale de sa Carta de Logu si nd’est incuradu su repartu digitatzione e l’at passadu in s’iscanner in sa sala a s’aposta. Sa brutacòpia digitale chi nd’est essida l’ant currègida e impaginada ponende sos cumandos chi serbint pro su produsimentu e sa transcodìfica de s’iscritu in còdighe Braille. A pustis l’ant imprentada e ligada.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22