Su Comune de Alzachena bogat s’aplicatzione My Arzachena Turismo pro dare informos ufitziales frunidos in deretura dae sa cambarada de Arzachena Turismo in contu de addòbios, istruturas de retzimentu e servìtzios utilosos pro gosare de una vacàntzia bella in su territòriu comunale. Sa faina dd’at promòvida s’assessora de su Turismu, Cristina Usai, pro pònnere a disponimentu de sos turistas un’aina simpre pro iscobèrrere s’oferta turìstica de su comune gadduresu, de sos burgos suos in su mare de Cannigione, Porto Cervo e Baja Sardinia, e pro connòschere fintzas sas resursas de sas cussòrgias de a intro.

S’aplicatzione s’atzunghet a sas ainas de comunicatzione chi sunt giai a disponimentu de s’Ufìtziu de su Turismu e chi ocannu los ant annoados, comente a sa pàgina web ufitziale www.arzachenaturismo.com e su libreddu de 50 pàginas chi est una ghia a sas bellesas de su territòriu e chi si nche podet leare in fatu a sa torrada dae sas vacàntzias. Sa punna de custu traballu est sa de pònnere in bidriera su territòriu, ma fintzas siendas e operadores de su setore de su turismu, cun s’inditu fintzas de ue s’agatant. Sos iscritos sunt semper agiornados.

S’aplicatzione si podet impreare in su telefoneddu e in su tablet e faghet a nde l’iscarrigare pro sos sistemas IOS e Android. Presentat una panoràmica in contu de sas istruturas de retzimentu, de recreu e de sos trasportos, consìgios utilosos in contu de bias e de parchègios, consìgios pro itineràrios alternativos e logos ispantosos chi si podent bisitare in cale si siat istajone.

Bene in craru bi sunt sos informos in contu de sa Covid-19 e de su lassapassare birde, sas notìficas chi ammentant sos addòbios de sa chida, sa descritzione de sos caminos pro fàghere trekking, de sas prajas, de sos logos archeològicos, de sos museos e de sos àteros logos e cuncordos culturales de su territòriu.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22