Dae oe, chenàbura 6 de austu de su 2021, in Itàlia movet s’òbligu de sa tzertificatzione birde pro pòdere gosare de unos cantos servìtzios, pro nde nàrrere unos cantos pro pòdere intrare a locales serrados, tzìnemas, teatros e museos. Su tzertificadu birde, in sos traghetos, no at a serbire pro sos biàgios dae unu logu a un’àteru de sa matessi regione. Pro su chi pertocat sos postales cheret ancoras posta in craru sa chistione de de s’òbligu de su lassapassare birde: s’idea est chi s’òbligu si pòngiat pro si transire dae una regione a s’àtera, ma non pro biàgios a intro de sa matessi regione. Pro sos clientes de sos albergos chi cherent andare a ristorantes o a tzilleris in logu serradu a intro de s’albergo etotu non ddoe est s’òbligu de su lassapassare birde. Sas dies de corantena de òbligu pro sos vatzinados (cun duas doses) positivos a sa Covid-19 nde diant dèpere calare dae deghe a sete. Abarrant deghe sas dies de corantena pro sos chi non sunt vatzinados. Est prontu fintzas su pranu pro s’iscola aprontadu dae su ministru Bianchi pro su chi pertocat s’organizatzione de sa didàtica pro su mese de cabudanni. Su decretu-lege nou Covid-19, su de duos dedicadu a sa tzertificatzione birde, at a cumpletare su cuadru de s’introduida de sa tzertificatzione birde cun s’àteru decretu chi apostivigaiat dae su 6 de austu s’òbligu de sa tzertificatzione contras de sa Covid-19 pro intrare a ristorantes, museos, pischinas, ispetàculos abertos a su pùblicu, sagras, festas, fieras, cunvegnos e cungressos, tzentros termales, parcos a tema e parcos de ispàssiu. Sas cunditziones chi permitint de otènnere su lassapassare birde sunt tres: sa de èssere sanados dae sa Covid-19, sa de àere fatu unu tampone (cun resurtadu negativu) in sas ùrtimas 48 oras o sa de àere fatu a su mancus una dose de vatzinu. a.i.g. Attività realizzata col contributo della Regione Sardegna – IMPRENTAS 2020-2021. LR 22/2018, art22