A sa Sardigna l’ant assignadu batòrdighi banderas biaitas, sinnu oramai non de prajas e abba pulida ebbia, ma fintzas de servìtzios. Nùmeros, duncas, cunfirmados. Ma cun un’intrada noa, sa de Santu Franciscu di L’Aglientu, e un’essida, sa de Teulada. Intra de sos 32 critèrios de valutatzione pro pòdere otènnere custu “marcu de calidade” assignadu dae una Giuria natzionale chi nde faghent parte fintzas sos Ministeros de su Tramudu ecològicu, de sas Polìticas agrìculas e de su Turismu, bi sunt fintzas istruturas alberghieras, servìtzios sanitàrios de utilesa pùblica, informos turìsticos, signalètica agiornada, educatzione ambientale. In s’ìsula sas banderas sunt cuntzentradas prus che totu in su nord, ma ònnia provìntzia si podet bantare de nd’àere otentu a su mancus una. Movende dae sud sa bandera de sa Fee at a isbentulare in Cuartu Sant’Aleni e Sant’Antiogu. Artziende, banderas biaitas in Barì e Tortolì, in Ogiastra. In provìntzia de Aristanis su prèmiu est tocadu a Turri Manna. In Gaddura reconnoschimentu a Badesi. In provìntzia de Tàtari su prus de sas banderas: ant a isbentulare in Santu Franciscu di L’Aglientu, Lu Palau, Casteddu Sardu, Madalena, Lungoni. E bi sunt fintzas La Trinitai e Vignola. Sa Fee at premiadu fintzas deghe portos turìsticos. Sunt sos de Cala Gavetta (Madalena), su Portu turìsticu comunale de Lu Palau, su Portu de Lungoni, sa Marina de s’Ursu de Poltu Quatu (Alzachena), Portu Chervu Marina (Alzachena), sa Marina di Portu Rotundu (Terranoa), sa Marina di Portiscu (Terranoa), su Portu turìsticu de Casteddu Sardu. E, in provìntzia de Nùgoro, sa Marina de Baunei e Santa Maria Navarrese. In provìntzia de Casteddu bandera biaita in Marina di Capitana (Cuartu Sant’Aleni). Is portos premiados, narant in sa Fee, “mustrant chi sa portualidade turìstica at afortigadu sos sèberos de sustenibilidade, aende sos rechisidos prevìdidos pro s’assignadura internatzionale, assegurende sa calidade e sa cantidade de sos servìtzios dados respetende s’ambiente”. a.i.g. Attività realizzata col contributo della Regione Sardegna – IMPRENTAS 2020-2021. LR 22/2018, art22