Su montigru de Serravalle est unu bastione naturale incaradu cara a sa badde saliosa de su frùmene Temo, inghiriadu dae pasturas e padentes, e cara a Bosa, bidda istòrica medievale chi l’est merèssidu su reconnoschimentu de èssere su de duos burgos prus bellos de Itàlia, nàschidu a pees de su monte in su cùrrere de duos sèculos intra de su Dughentos e su Batorghentos.

S’esistèntzia in edade romana de una bidda est cunfirmada dae iscavos archeològicos. Sa bidda fiat nàschida a inghìriu de sa sea de su Medioevu artu de Santu Pedru chi s’agatat in su ‘bighinadu de su pìscamu’, cun a costàgiu una turre/campanile a base romana, cun acanta su campusantu serradu. Fache a sos annos Milli faghiat parte de su Rennu de Torres. Sa bidda, a s’acabbu de su Dughentos, resurtat in poderiu de sos marchesos Malaspina.

Su casteddu de oe at connotu interventos meda de acontzu e ammanniamentu fatos dae sos meres diferentes (Turritanos, Malaspina, Arborea, Aragonesos), ma allogat su sètiu de defensa chi aiant chertu sos marchesos toscanos-lìgures cumentzende dae s’acabbu de su Dughentos e chi lis fiat bènnidu a mala bògia a lassare sos casteddos issoro a sos Aragonesos chi aiant incarreradu s’invasione de s’ìsula in su 1323: a pustis de su 1365 aiant pèrdidu possedimentos e poderiu. In su 1317 su casteddu de Bosa fiat intradu in poderiu de sos giùighes de Arbaree, alleados arrennegados de sa Corona de Aragona, e chi l’aiant tentu fintzas a s’acabbu de su Batorghentos, cando su rempellu issoro nde l’aiant istudadu sos Aragonesos e Bosa l’aiant destinada in fèudu a sos fideles issoro chi biviant in su casteddu.

In intro, a prus de sa capella de su palàtziu, abarrant sos ruinales de sa residèntzia de sos nòbiles, cussa puru afortigada e in ue bi biviant sos meres de su casteddu e sa famìllia issoro. Arrimada a sa muralla de Nord, presentat una pranta retangulare cun (a primìtzios) bator turres in sos contones e una turrighedda triangulare in mesu de sa partza de intro: inditos de acontzu nos faghent a connòschere pagu prus o mancu sa partzidura de sos aposentos de su palàtziu.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22