Claudia Crabuzza est una boxi nodia de S’Alighera/L’Alguer. Sa stòria sua cun sa mùsica cumentzat in su 2000 candu cun Fabio Manconi, fisarmònica e pianu, e Andrea Lubino, baterista, ant fundau is Chichimeca. Cun custa formatzioni at pubricau tres album, Barbari (2003), Luce-nur (Ep 2005) e Cuore? (2012). In su 2010 at bintu su prèmiu Maria Carta po su progetu Violeta Azula, boxi e ghitarra cun Caterinangela Fadda, e in su 2012 est bessia cun su cd Un home del país, un’omàgiu a su grandu cantautori aligheresu Pino Piras. In su interis at traballau cun artistas sardus e stràngius, Tazenda, Il Parto delle nuvole pesanti, Pippo Pollina, is messicanus La Carlota e atrus.

At finas pubricau unu lìburu de contus Victor e altri umani (2012). Su 2016 est un’annu de importu mannu, poita ca bessit su primu discu totu de issa, Com un soldat, pubricau de is cadalanus Microscopi, sonau impari a Fabio Sanna e scritu totu in su cadalanu de S’Alighera. Podeus nai ca custu est stètiu unu grandu sucessu, difatis at bintu sa Targa Tenco, su prèmiu Mario Cervo, su prèmiu Botteghe Oscure, mentzioni in su Premio Parodi e seletzioni in su Premios Min spanniolu. In is annus infatu at sighiu cun atrus omàgius a artistas balentis, Lhasa de Sela cun su Ensemble Laborintus, Pino Piras cun Pietro Ledda e Violeta Parra cun Difesa de Violeta Parra, tradutzionis de is cantzonis de sa grandu boxi cilena, presentau in su Tenco puru. Un’atra faina est unu discu po is 150 annus de su nascimentu de Gràtzia Deledda, cun is fueddus de Stefano Starace e acumpangiada de is Chichimeca. Sa diretzioni artìstica est de su Maistu Max Pitzianti e est sonau impari a sa Orchestra Jazz della Sardegna. E oi puru est sighendi a fai, artista sintzilla de S’Alighera chi no ddi timit a s’oberri a su mundu e a is atras culturas.

*Fotografia de G.M. Mavilla

T.C.

Attività realizzata col contributo della Regione Sardegna – IMPRENTAS 2020-2021. LR 22/2018, art22