Sas potecarias sunt ispartas in su territòriu regionale e custu at a permìtere a sos tzitadinos chi cherent fàghere su test de lu fàghere a manera prus discansosa.

In Sardigna su test pro averiguare sa presèntzia o nono de su virus Sars-Cov-2 s’at a pòdere fàghere fintzas in potecaria. L’at apostivigadu sa Giunta regionale cun una delìbera aprovada in s’ùrtima setziada.

Sos tzitadinos chi cherent tzertificare sa negatividade issoro a su virus podent fàghere, a pagamentu, su tampone antigènicu in sos locales de sas potecarias chi oferint su servìtziu. Sas potecarias cunventzionadas, pùblicas o privadas, ant a pòdere comintzare a fàghere sos test mandende a sa Diretzione generale de s’Assessoradu de sa Sanidade sa comunicatzione chi iscumproat chi sos locales sunt adatos pro cumprire custa faina.

Gasi etotu comente prevìdidu pro sos laboratòrios privados, sas potecarias registradas tenent s’òbligu de allistare sos test fatos in sa prataforma regionale, chistione – custa – chi at a permìtere a sas potecarias de agiudare in su monitoràgiu epidemiològicu. In prus, su disponimentu de sa Giunta regionale nde bogat s’òbligu de sa retzeta mèiga, chi no at a serbire prus pro domandare su tampone nemmancu in sos laboratòrios privados.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22