Pro pònnere e contivigiare matas e fogimenta non serbit a tènnere a mala bògia una terra a disponimentu: chie si cheret ispassiare cun un’ortu urbanu piticheddu lu podet fàghere ponende carchi testu in su balcone.

Sas resones pro incarrerare unu cultivu in tzitade sunt diferentes: isparànniu, ecologia, isperimentatzione, imbonimentu estèticu.

Diat pòdere èssere apassionante meda a fàghere prus birde sa tzitade in ue si bivet e a papare carchi birdura prodùsida dae nois etotu. Si diant pòdere interessare fintzas a sos pipios in una faina educadora e ispassiosa chi si podet fàghere in domo etotu.

Su cultivu in logu de testu no est dificultosu, ma bi cheret impignu de sighidu, pro abbare e contzimare sos fundos. Sighende unas cantas trassas, su sutzessu est asseguradu.

In teoria totu sas matas si podent pònnere in unu testu, in un’istèrgiu de mannària giusta e cun su contivìgiu giustu. Sigomente su logu in su balcone no est mannu meda, bisòngiat a seberare cultuvos e calidades de fundos chi potzant bìvere in unu testu. Faghende gasi s’ant a otènnere soddisfatziones prus mannas e si podent isfrutare mègius sos pagos metros cuadrados de su balcone.

S’ortu in su balcone dipendet meda dae s’abba chi li betamus pro l’abbare. Sos testos, difatis, non sunt mannos meda e sas raighinas non tenent possibilidades meda de chircare s’abba prus in fundu, comente diant fàghere si esserent prantadas in s’ortu. In prus, agiomai semper, sos balcones sunt s’unu a subra de s’àteru e duncas sas matigheddas si diant pòdere agatare a suta de una “cobertura” e non podent gosare de s’abba proina.

Est pro cussu chi tocat de abbare sa fogimenta de su balcone a fitianu. Chie tenet matas meda diat pòdere fintzas cuncordare unu sistema de irrigatzione a istìddiu, chi est su sistema mègius pro abbare, ma in balcones piticheddos diat pòdere bastare fintzas unu arrusciadore.

Bisòngiat de abbare o a meritzeddu, a s’iscurigadòrgiu, o a mangianu chitzo, bastet chi non s’abbet in sas oras prus bascosas de su die.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22