Dae su 13 a su 17 de trìulas torrat su Gaddura Buskers Fèstival, chi lompet a sa de noe editziones e chi ocannu est dedicadu a su valore universale de su risu. A Lungoni b’ant a arribare deghe cumpangias dae logos diferentes de su mundu intra de illusionistas, gioghistas, acròbatas, giogadores, trampolieris, personàgios beros de fumetos e musitzistas ispantosos. B’at a àere addòbios ispetziales e chi non si podent pèrdere cun Andrea Caschetto, s’ambasciadore de su risu chi l’ant tzacarradu sas manos in s’ONU in ocasione de sa Die mundiale de su Presu, gràtzias fintzas a sa collaboratzione cun s’ente Clown&Clown in su progetu “Pìndulas de Clown&Clown in Sardigna” dedicadu a sa figura de su gioghista comente a figura artìstica e sotziale. Clownerias, illusionismu, giogheria, umorismu, maia, torchiduras istrambas, esperièntzias acrobàticas e ispàssiu mannu: currulende su presu unu bi podet passare totu sa vida o, forsis, est acanta nostra, ma non l’ischimus. Su Gaddura Buskers Fèstival, unu de is addòbios prus isetados de s’istadiale, mancari in editzione lèbia proponet ocannu unu programma in contu de su valore universale de su risu. “Bolemus espressare unu messàgiu de positividade pro sa vida e s’invitu a torrare a abitare sos logos pùblicos, torrare a sas tzitades nostras s’ànima de logos in ue sa gente s’addòbiat a pare, logos de cuncàmbia, logos de presu”, narat Alberto Pisu, diretore artìsticu de su Gaddura Buskers Fèstival, cuncordadu dae s’assòtziu “Dietro le Quinte” e mentovadu intra de sos bìndighi fèstival mègius in Europa in su giassu de biàgios expedia.it. Unu programma chi in, in sas chimbe dies de su Fèstival, s’at a isboligare in tres logos: in Santu Pascale (fratzione de sa bidda), in su Tzìnema Arena Odeon e in Pratza de sa Libertade in Lungoni. Unu programma de non pèrdere! a.i.g. Attività realizzata col contributo della Regione Sardegna – IMPRENTAS 2020-2021. LR 22/2018, art22