Cando mancat unu mese a su de 140 anniversàrios de su monumentu a Lionora de Arbaree, s’Assessoradu de sa Cultura de su Comune de Aristanis e sa Fundatzione Aristanis cuncordant una filera de initziativas pro regordare sa ricurrèntzia de importu. S’anniversàriu est in programma in ca coa de chida de su 22 e 23 de su mese de maju. Su monumentu a Lionora de Arbaree, su primu monumentu làicu in Itàlia dedicadu a una fèmina, chi resumat s’istòria de sa tzitade de Aristanis, at piessignadu cun su tempus s’urbanìstica de sa pratza dedicada a sa Giuighissa, e s’est furriadu a èssere su sinnu forte chi rapresentat totu sa comunidade. Cun su grupu Facebook “Sas milli caras de Lionora” si domandat a totu sos tzitadinos, apassionados, curiosos e a totu cussos chi cherent leare parte a s’initziativa de cumpartzire fotografias antigas de su monumentu o immàgines antigas de sa pratza, chi mustrent acontèssidos bìvidos e connotos, in ue si biat fintzas s’istàtua de sa Giuighissa. Sas immàgines cumpartzidas in su grupu de Facebook las ant a regòllere in unu vìdeu de agabbu chi las at a mustrare totus e chi l’ant a cumpartzire in su grupu etotu e in sos àteros canales sòtzial. Pro nde torrare su caminu de s’evolutzione de sa pratza e de su monumentu a Lionora, in sos cummentos a s’immàgine at a tocare a pònnere s’annu pagu prus o mancu cando sa fotografia l’ant tirada, a manera de pòdere fraigare unu passu in fatu de s’àteru s’istòria e sas mudaduras chi sa pratza at connotu cun su tempus. Su grupu, in s’indiritzu https://www.facebook.com/groups/imillevoltidieleonora, est abertu a totus e at a abarrare abertu fintzas a su 22 de maju, pro regordare su chi fiat acontèssidu in cussa matessi die de 140 annos in antis, cando su cuncordu de s’istàtua dedicada a Lionora de Arbaree aiat mudadu a manera crara sa bisura de sa tzitade de Aristanis, gasi etotu comente sa Giuighissa cun sas fainas suas chi s’ant a regordare semper aiat marcadu s’istòria de sa comunidade aristanesa e de totu sa Sardigna. a.i.g. Attività realizzata col contributo della Regione Sardegna – IMPRENTAS 2020-2021. LR 22/2018, art22