Prima regionale pro Rondò final, su film chi contat cun immàgines unu ritu antigu meda, foras de su tempus – su de sa festa de Sant’Efis – chi s’annoat dae 365 annos agiomai aguale. Un’immaginàriu de retratos chi faghet meledare in contu de su tzìnema, de sas miradas, de sos ritos, de sas comunidades. S’apuntamentu est in Casteddu, domìnigu 19 de nadale, a sas 11.00 in su Greenwich de bia de Tàtari, e lunis 20 de nadale, a sas oto de sero, in s’UCI-Cinemas de pratza de s’Unione Sarda, in intro de sa rassigna “Tzìnema de segunda manu 3”. B’ant a leare parte sos autores de su film, unos cantos cumponentes de sa cambarada chi l’at fatu e su diretore de sa Tzineteca Sarda, Antonello Zanda. Sa faina de Gaetano Crivaro, Margherita Pisano e Felice D’Agostino, prodùsidu dae Ruga Film e L’Ambulante a manos de pare cun Virage, agiudadu dae sa Sotziedade Umanitària Tzineteca Sarda de Casteddu e fatu cun su contributu de sa Lege sarda in contu de su tzìnema, mustrat chentu annos de immàgines giradas in sa festa, chircadas e agatadas, cantigheddos de pellìcula, nastros de famìllia, pixel. Unu traballu de montàgiu chi si faghet esperièntzia, chirchende su chi non si biet, su chi abarrat, in unu tempus chi s’agatat intra de bisu e ammentu. Su tìtulu de su film movet dae unu de sos contos prus biatzos de sa festa casteddaja de su Primu de maju, cussu iscritu dae Sergio Atzeni in “Rondò final”, publicadu a pustis de sa morte de Atzeni in sa regorta “Sos bisos de sa tzitade bianca”. A.I.G. Attività realizzata col contributo della Regione Sardegna – IMPRENTAS 2020-2021. LR 22/2018, art22