Benimos dae un’annu chi galu una vorta nos at imparau chi nos depimos amentare de èssere cuntentos de su chi tenimos e non pessare semper a su chi nos mancat. Ca sa vida, l’amos bidu, nos ispantat a bortas in bene e a bortas in male, e est in su casu chi siat male chi non nos depimos intèndere pèrdios, ma èssere fortes e meres de sas dies nostras.

Cando arribat sa fine de s’annu si cominzant a fàghere duos contos supra su chi non est andau comente cheriamos. Ma si imbetze comintzamos a pessare a su chi est andau comente amos isperau? Paret semper chi depimos fàghere sos contos de su negativu, chena ammentare sa bellesa de cada die.

Tocat de proare a tènnere isetos bonos po como e po sa vida, ma si custu non sutzedit semper non tocat de si pèrdere de ànimu.

S’ànimu est su chi tenimos a intro e su chi tocat de pònnere a cùrrere in sos momentos chi nos ponent prus pessamentos. Comente cando si domandat a un cadderi de s’Ardia de Sèdilo: ite serbit po cùrrere s’Ardia? Corazu? Preparatzione? Caddos bonos? Cada cadderi bos at a rispòndere: Animu, bi cheret Animu.

Ed est custu s’augùriu po custa Pasca de Nadale po cada siat s’isetu vostru. Chi tenzedis ànimu po afrontare cada dies e po arribare a totu su chi bos ades postu in conca.

M.B.

Attività realizzata col contributo della Regione Sardegna – IMPRENTAS 2020-2021. LR 22/2018, art22