Duas datas noas arrichint sa torrada a sas iscenas isetada meda de s’atore e regista Jacopo Cullin: s’ispetàculu nou suo “È inutile a dire!”, in iscena in s’Auditòrium de su Cunservatòriu de Casteddu dae su 20 a su 23 de nadale, in su Teatru Verdi de Tàtari su 27 de nadale e in su Teatru Eliseo de Nùgoro su 3 de ghennàrgiu, at a fàghere galu tapa in su cabu-logu isulanu mèrcuris 5 e giòbia 6 de ghennàrgiu, cunsiderende chi ant ispatzadu totu sos billetes pagos minutos a pustis dae cando ant comintzadu a los bèndere.

Sa bèndida de sos billetes pro sos apuntamentos noos de Casteddu at a abèrrere sa die de lunis 13 de nadale, cumentzende dae sas 10.

Pro pòdere intrare a totu sos ispetàculos at a èssere obligatòriu a mustrare su super Tzertificadu birde.

“È inutile a dire!” est un’ispetàculu iscritu cun sabidoria dae sa pinna de Cullin, chi resurtat a si mòvere in sa làcana dìliga intra de ironia e comitzidade, favoressende su meledu in contu de unas cantas temàticas printzipales chi piessignant su tempus nostru: sotziedade lìcuida, debilesa de sas relatziones e sa crisi esistentziale costante chi pertocat a s’èssere umanu. In iscena Cullin intèrpretat a tres de sos personàgios suos istòricos, seberados a posta pro fàghere a rìere e pensare de fronte a sas timorias e nevrosi de su tempus nostru.

Acanta sua subra su palcu s’atore Gabriele Cossu, collega, amigu e agiudu iscumproadu, cun sa parte musicale contivigiada dae sos cumpàngios de biàgiu espertos Matteo Gallus cun su violinu, Riccardo Sanna cun sa fisarmònica e Andrea Lai cun su contrabbassu. Sas gràficas de s’ispetàculu sunt a incuru de s’artista sardu Giorgio Casu (in arte Jorghe), cun sas fotografias de Damiano Picciau.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22