Giòbia 15 de abrile, in ocasione de sa Die mundiale de s’arte, su fèstival culturale Liberevento at a acasagiare a su divulgadore giòvanu Jacopo Veneziani.

S’apuntamentu est a sas chimbe de merie in sa pàgina Facebook de su fèstival, in ue Veneziani, chi tenet mìgias e mìgias sighidores in sos social e chi est semper presente in sa trasmissione de Rai 3 “Le parole della settimana”, at a faeddare de su libru suo “#Divulgo”, publicadu dae Mondadori Electa. Cun s’autore nd’at a chistionare s’istòrica de s’arte Manuela Perria.

Mentras sighint is addòbios cun sos autores, andat a in antis fintzas su cuncursu fotogràficu “Liberevento Libertà 2.0”. Pro bi pigare parte bastat a tirare una fotografia chi torret s’idea chi si tenet de libertade, acumpangiada dae una fràsia originale o leada dae carchi libru chi faeddat de libertade. In sas duas chidas in fatu sas fotografias arribadas las ant a publicare in sa pàgina Facebook de Liberevento e sa chi at a otènnere prus “mi praghet” l’ant a premiare.

Comente a prèmiu bi sunt Mystery box de Liberevento cun trastigheddos e àteras cosas ligadas a sa manifestatzione.

Ma b’at fintzas àtera cosa: fintzas a su 30 de maju b’at tempus pro presentare sos traballos a su Prèmiu literàriu natzionale “A vuxe de Câdesédda. In ricordo di Bruno Rombi”. Su Prèmiu, pro iscritores e poetas de ònnia natzionalidade, est partzidu in duas setziones: “Poesias e contos in limba italiana” e “Poesias e contos in limba tabarchina”. Si previdet fintzas una setzione ispetziale “Giòvanos”, pro pitzinnos e pitzocheddos. Su regulamentu cumpletu s’agatat in s’indiritzu https://www.liberevento.it/concorsoletterario2021 .

Liberevento Live&Streaming lu cuncordat s’assòtziu culturale Contramilonga.