Andria Garau est unu studiosu casteddaju giòvunu e balenti chi s’est specializau in stòria medievali sarda e chi est traballendi po fai connosci sa stòria giudicali cun su traballu acadèmicu ma finas cun s’associatzionismu, in is scolas e in cuntestus pùbricus e privaus. In custu volùmini s’idea fiat de contai sa vida de Marianu IV de Arbarei, fortzis sa figura stòrica sarda prus importantis de totu is tempus, babu de Elionora e de Ugoni III, atrus ddus mannus de sa stòria giudicali sarda. Iat incumentzau a sterri sa Carta de Logu, acabada a is tempus de Elionora, e iat mandau ainnantis sa gherra contras a sa Corona de Aragona, mancai issu e is fillus puru fessint de formatzioni cadalana, nàscius e pesaus innias. Po cussu puru a s’acabu de totu ant a essi prutzessau cumenti a traitoris.

Custu stùdiu si torrat totu sa mannària de su Judike Marianu, s’unicidadi de is istitutzionis giudicalis, a tipu sa Kita de Buiakesos o sa scolca, in su panorama europeu ma fintzas cumenti sa Sardìnnia, sendi su centru de su Mediterràneu, fessit in mesu de totu is chistionis polìticas de is tempus suus, de is gherras a is cojas e is trassas de is cortis europeas.

De grandu interèssiu s’imperu de fontis cumenti a su Proceso contra los Arborea, e su contu de totu su chi si movit a palas de una gherra, spias, mercenàrius e acòrdius stratègicus. Su tempus de is Giugis est unu tempus agiumai mìticu po nosu sardus, aundi is Giudicaus, ddui torreus, fiant in mesu de totu sa polìtica europea e si dda giogànt cun totus, a sa pròpiu artària, mancai siat acabada cumenti est acabada, cun sa Corona aragonesa chi iat conchistau totu s’ìsula pròpiu candu Ugoni pariat serrendi sa chistioni, innantis chi ddu bocessint a traitoria. Lìburus aici depiant essi in totu is scolas e una sienda de totu is sardus.

T.C

Attività realizzata col contributo della Regione Sardegna – IMPRENTAS 2020-2021. LR 22/2018, art22