Movet domìnigu 28 de martzu sa rassigna “A mesa cun sas Fèminas de su Binu”: una filera de apuntamentos enogastronòmicos, unu ònnia mese, cun protagonistas is produsidoras de s’assòtziu “Sas Fèminas de su Binu”. Sos addòbios s’ant a fàghere in su ristorante Cunventu de Santu Giusepe, in Casteddu. Cuncordados cun s’agiudu de Slow Food Sardigna, is addòbios sunt s’ocasione pro connòschere mègius a sas produsidoras, ristoradoras, enotecàrias e sommelier chi in s’ìsula nostra promovent sa cultura de su binu. In sos addòbios sos amantiosos de su binu e de su papare bene ant a pòdere ascurtare is contos issoro e tastare su binu seberadu pro acumpangiare sos màndigos chi, a borta a borta, ant a ammentare sas cussòrgias diferentes de s’ìsula. Su primu apuntamentu est cun Elisabetta Pala, presidente de sa delegatzione regionale de “Sas Fèminas de su Binu” e fundadora de sa cantina Mora&Memo. In su Cunventu de Santu Giusepe at a portare su contu de s’atrivimentu e de sa passione sua nàschida in su 2011 cando, a pustis de àere lassadu sa sienda de famìllia, at cumentzadu a currulare su bisu de criare unu binu chi l’assimìgiet. Prandende s’ant a pòdere tastare tres etichetas de sa cantina sua, su “Tino Sur Lie” (Ìsula de sos Nuraghes IGT), su “Rosato é” (unu misturu de Mònica e Cannonau) e “Ica” (Mònica de Sardigna DOC), paris cun màndigos chi arribant dae Serdiana, bidda de su binu in ue Elisabetta est crèschida e in ue at fatu nàschere Mora&Memo. Su primu apuntamentu faghet a lu prenotare, a 40 èuros a persone, telefonende in deretura a su nùmeru de su ristorante 070.543343 o iscriende una e-mail a s’indiritzu info@conventosangiuseppe.com . Su de “Sas Fèminas de su Binu” est un’assòtziu sena de punna de lucru chi avalorat sa cultura de su binu e su rolu de sas fèminas in sa filera pro prodùere binu. Nàschida in su 1988, oe nde faghent parte prus de 800 sòtzias intra de produsidoras, ristoradoras, enotecàrias, sommelier e giornalistas. Sas Fèminas de su Binu sunt coordinadas, in totu sas regiones de Itàlia, in delegatziones. a.i.g. Attività realizzata col contributo della Regione Sardegna – IMPRENTAS 2020-2021. LR 22/2018, art22