Sa cantadora israeliana Noa e su sonadore de trumba belchiddesu Paolo Fresu sunt sos intèrpretes dìligos de “Duos coros – Andimironnai”, cantzone cumposta, arrangiada e orchestrada dae su pianista e cumposidore sardu Andrea Granitzio, essida domìnigu 21 de martzu in sas prataformas de streaming prus de importu. Su traballu movet dae sa melodia de s’Andimironnai, cantu sardu de su connotu a una boghe, gasi antigu chi faghet parte de sas raighinas culturales de sa Sardigna chi si nd’est pèrdida sa memòria, e faghet parte de unu progetu prus mannu de avaloramentu de sos prodùsidos culturales identitàrios de s’ìsula nostra. In su faghimentu de sa cantzone ant ghetadu una manu de agiudu fintzas sa Budapest Art Orchestra ghiada dae Peter Pejtsik, e una cambarada de musitzistas de primore comente a Alice Marras e Stefania Secci Rosa (coros), Gianluca Pischedda (violontzeddu), Alessio Povolo (contrabbassu) e Daniele Russo (bateria). A Andrea Granitzio (chi in “Duos coros – Andimironnai” sonat su pianoforte), pro iscrìere e cumpònnere sa cantzone, l’ant cussigiadu su poeta Mario Brasu e s’etnomusicòlogu Marco Lutzu. Sas gràficas e sos vìdeos chi acumpàngiant sa presentada de su progetu ddos at contivigiados Fabio Coronas. Sa cantzone l’ant registrada in su Jane Studio de Casteddu cun sa ghia de s’ingegneri de su sonu istadunidensu Marti Jane Robertson, chi at contivigiadu fintzas su mix e su mastering. Noa (chi at chertu arrichire sos versos sardos cun s’ùrtima cruba in ebràicu) at registradu sa boghe sua in s’istùdiu de Tel Aviv, Paolo Fresu at registradu sa trumba sua in s’Over Studio de Cento (Ferrara) cun su tècnicu de su sonu Angelo Paracchini, mentres sa Budapest Art Orchestra at registradu in s’East Connection Music Recording, Istùdiu 22 de Budapest. a.i.g. Attività realizzata col contributo della Regione Sardegna – IMPRENTAS 2020-2021. LR 22/2018, art22