In Nùgoro comintzat sa de 121 editziones de sa Festa de su Redentore, dae su 23 de austu fintzas a su 29. Su sìndigu Andrea Soddu, su vitze-sìndigu Fabrizio Beccu e s’assessore de sa Cultura e de su Turismu Luigi Crisponi ant presentadu sos addòbios de sa festa religiosa e de cussa tzivile, ocannu dedicada a s’iscritora nugoresa Prèmiu Nobel Grazia Deledda, in ocasione de sos 150 annos dae sa nàschida sua. Un’editzione chi, a dolu mannu, pro more de sa Covid-19, s’at a fàghere sena de s’isfilada de sas cambaradas de òmines e fèminas cun sa bestimenta de su connotu, cosa chi faghet pèrdere a sa manifestatzione una prenda de identidade apretziada meda ònnia annu dae sa gente. Custa chida de festa s’at a piessignare pro una filera de fainas chi dae 120 annos faghent de su Redentore una de sas festas prus caras pro sos Sardos e fintzas pro mìgias e mìgias turistas chi in sa coa de su mese austu bìsitant Nùgoro pro dda sighire. Colores, mùsica, coros, sonos, ritos religiosos ant a èssere sos protagonistas, gràtzias a artistas, cantadores, poetas, musitzistas, figurantes, prus de 400 persones prontas pro espressare in sa mègius manera s’identidade regionale in sa festa prus cara a sos Nugoresos. Sos addòbios s’ant a fàghere is sos logos identitàrios de su connotu, peri sas bias e sas pratzas de sa tzitade. Intra de sas àteras cosas s’ant a pòdere bìere sos disinnos ispantosos de su pintore Manuelle Mureddu e sas faches de sas crèsias, de sos palàtzios e de sos muros s’ant a fàghere ischermos naturales pro iscenografias ativas, cun sa projetzione de sos disinnos de s’artista nugoresu. Addòbios, duncas, de importu culturale mannu, ma pro torrare a bìere totu sos colores chi piessignant su redentore amus a dèpere isetare a ocannu chi benit, comente est acontèssidu pro àteros addòbios de festas mannas de Sardigna, chi non si sunt pòdidas fàghere pro more de sa pandemia. a.i.g. Attività realizzata col contributo della Regione Sardegna – IMPRENTAS 2020-2021. LR 22/2018, art22