In mesu de is tantis discus de mùsica sarda, a calincunu ddi spetat un’atentu pretzisu. Prus de totu candu fait parti a unu connotu chi est sparessendi, chi prus de is atrus est sunfrendi su mundu cambiau e is costumàntzias diversas de sa genti sarda. Sa cantzoni longa a launeddas est unu de custus cantus, arrichesa de is cantadoris crabarissus e de s’oristanesu, cantu imparau e no improvisau chi est connoscendi tempus malus. Is tempus candu si poniat cantzoni funt cambiaus e pròpiu po cussu su discu A cantzoni longa de Tonio Stara, a sa boxi, e Stèvini Pinna, a is launeddas, est un’operatzioni de importu mannu, chi depeus saludai cun prexu e cuntentesa. Is cantzonis funt postas de Stara etotu e de La Mora, allomìngiu de Giusepi Pinna, is boxis arregordant cuddas mìticas de Crabas, de Gavaurru a Patata, chi si contànt de unu mundu chi oi no s’agatat prus.

S’ idea de arregistrai custu discu in logus cumenti a domus, cantinas o localis pùbricus, bolit torrai pagu pagu de cuddus atòbius de cantadoris e ascurtadoris, candu si pinnigànt apari po su gustu de sa cumpangia e de cantai. Ddui est finas Sa cantzoni de sa spigadora, chi ant arregistrau in logu ‘e pràngiu, aici cumenti est bessia in cuss’ocasioni, chena ‘e pensai de nci dda depi ponni in d-unu discu. Po su praxeri de torrai a intendi is sonus de un’arrogheddu de vida de dònnia dii, cumenti nasciat in su momentu, chena ‘e sedatzai meda meda su andai naturali de is cosas. A prus de totu custu, ddui funt is ballus de Pinna, maistu de is sonus de canna crabarissus. E duncas custu bellu traballu fait torrai a bivi unu connotu chi fiat in perìgulu in is tempus de oi e ddu fait de sa manera mellus, cun cuscièntzia, arrispetu e amori po sighiri a bivi su presenti de sa traditzioni, cumenti narat Nàssiu Murru in sa presentada.

T.C.

Attività realizzata col contributo della Regione Sardegna – IMPRENTAS 2020-2021. LR 22/2018, art22