A l’ischiades chi sa pisca de su coraddu in su mare de sa Sardigna la podent fàghere sos piscadores professionistas ebbia chi tenent s’autorizatzione regionale? Sos piscadores depent àere in s’echipagiamentu issoro sos trastos pro sa respiratzione subàcuea, depent portare sa picheta ebbia e depent piscare a tretu de non prus pagu de 50 metros de fungudesa.

Ònnia annu s’assessore regionale de s’Agricoltura e de sa Pisca apostìvigat cun unu decretu suo:

a) sa dura de sa simana de pisca;

b) sa cantidade màssima de coraddu chi si podet piscare ònnia die segundu sa trassa de pisca;

c) sos tretos de mare in ue si podet piscare;

d) comente si podet otènnere s’autorizatzione regionale;

e) cantu tocat a pagare ònnia annu pro otènnere s’autorizatzione.

In su decretu, in prus, s’inditat su nùmeru màssimu de autorizatziones chi si podent dare ònnia annu.

In su 2021 sa pisca de su coraddu la podent fàghere sos piscadores autorizados dae su 1 de làmpadas a su 30 de cabudanni; ocannu s’ant a pòdere dare non prus de 25 autorizatziones.

Totu sos interessados ant a dèpere pedire s’autorizatzione a s’Assessoradu regionale de s’Agricoltura e de sa Pisca.

S’autorizatzione l’at a dare su diretore de su Servìtziu pisca cun unu provedimentu suo. Si su nùmeru de sas domandas est prus artu de su nùmeru de sas autorizatziones prevìdidas, pro su sèberu s’at a pigare a cunsideru:

1. s’antzianidade de pràtica a beru de sa faina de pisca de coraddu;

2. s’antzianidade de iscritzione in su Registru de sos piscadores de mare.

Si s’antzianidade de pràtica a beru de sa pisca de coraddu est che a pare cun cussa de carchi àteru piscadore, s’autorizatzione s’at a dare a sos piscadores chi tenent un’antzianidade prus manna de iscritzione in su Registru de sos piscadores de mare.