Sos binchidores de su Prèmiu Andrea Parodi, ùnicu cuncursu europeu de world music, sunt sos Still Life cun sa cantzone “Tempus”. A su progetu ìtalu/portoghesu chi tenet sa sea sua in Bartzellona, formadu dae sa cantante Margherita Abita e dae su violinista João Silva, est tocada fintzas sa mentzione pro sa mègius mùsica e cussa pro sa mègius interpretatzione, su Prèmiu de sos pitzocheddos e su Prèmiu Bianca d’Aponte International. Mancari cun dificultades mannas pro more de sa pandemia, sa Fundatzione Andrea Parodi nch’est resèssida a organizare cun sutzessu pro su 14 e 15 de maju sas finales de sa trèighi editziones, chi a primìtzios si depiant fàghere in s’atòngiu passadu ma chi las aiant transidas pro more de s’emergèntzia sanitària. Sa manifestatzione, chi si balet de sa diretzione artìstica de Elena Ledda, s’est fata in su Teatru Si’ e Boi de Ceraxius (Casteddu). L’ant trasmìtida in streaming in sas pàginas Facebook de sa Fundatzione Andrea Parodi, de Eja TV, de SardegnaEventi24, de Rai Radio 1 e Rai Radio Tutta italiana, media-cumpàngios de s’addòbiu. Su Prèmiu est s’ùnicu cuncursu europeu de world music, nàschidu pro ammentare a unu grandu artista comente a Andrea Parodi, esponente de importu de sa mùsica ètnica italiana e internatzionale, mortu 15 annos a como. Custa editzione l’ant presentada Ottavio Nieddu e Gianmaurizio Foderaro. Pro sos binchidores si prevident unos cantos bonos, una filera de cuntzertos e de partetzipatziones a sas editziones imbenientes de unos cantos fèstival cumpàngios de su Prèmiu Parodi, dae s’“European Jazz Expo” in Sardigna a Folkest in Friuli, fintzas a su Prèmiu Parodi etotu. A prus de custu, lis tocat una bussa de istùdiu de 2.500 èuros. A su binchidore de su prèmiu de sa crìtica, imbetzes, l’ant a donare su videoclip professionale de sa cantzone in cuncursu, pagadu dae sa Fundatzione Andrea Parodi. In prus, a unu de sos finalistas l’ant a invitare pro s’editzione imbeniente de un’àteru fèstival cumpàngiu, su Mare e Minieras. a.i.g. Attività realizzata col contributo della Regione Sardegna – IMPRENTAS 2020-2021. LR 22/2018, art22