Vitòria de importu pro s’iscuadra de Semplici cussa contras de sa Roma. S’allenadore, però, frenat su presu, ca ischit chi b’at ancoras cosa meda de fàghere.

Su Casteddu podet sighire a isperare pro sa sarvesa in custu campionadu. Eris at conchistadu tres puntos cun una partida ispantosa contras de sa Roma, agabbada 3 a 2 pro s’iscuadra de Semplici. Leonardo Semplici e Paulo Fonseca si sunt bidos una borta ebbia in sa carriera issoro de allenadores. Fiat in su mese de nadale de su 2019, cando sa Roma de s’allenadore portoghesu e sa Spal de su tècnicu toscanu si fiant afrontados in s’Olìmpicu. Aiant bintu sos grogos-rujos, 3 a 1, mancari chi s’iscuadra de Ferrara esseret binchende a primìtzios cun unu goal de Andrea Petagna.

Pro sos sardos una bìnchida chi permitit de si pònnere paris cun su Benevento in su de bator postos dae s’agabbu de sa classìfica, a 31 puntos, paris cun su Torinu, chi però at giogadu duas partidas in mancu de sas àteras iscuadras.

Pro su Casteddu sa de tres vitòrias paris: in su primu tempus sos casteddajos sunt andados luegos a in antis cun Lykogiannis (4′), ma sa Roma at paregiadu cun Carles Perez (27′). In su de duos tempos sos goal de Marin (12′) e de Joao Pedro (19′); Fazio torrat a abèrrere sa partida in su de 24 minutos.

Domìnigu 2 de maju, a sas tres, in s’istàdiu Diego Armando Maradona, s’at a giogare Nàpoli-Casteddu, isfida chi balet pro sa de 34 dies de campionadu.

Custu est su calendàriu cumpletu de is isfidas imbenientes de su Casteddu, in custa coa de campionadu bastante fadigosu:

su 09/05/2021, a sas tres, contras de su Benevento (Benevento – Casteddu);

su 12/05/2021, a sas noe de sero, contras de sa Fiorentina (Casteddu – Fiorentina);

su 16/05/2021, a sas tres, contras de su Milan (Milan – Casteddu);

su 23/05/2021, a sas tres, contras de su Genoa (Casteddu – Genoa).

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22