Sa festa de sa Die de Sardigna l’aiat cherta su Consìgiu regionale de sa Sardigna cun sa Lege regionale 14 de cabudanni de su 1993, n. 44, ponende-li su nùmene de Die de su Pòpulu sardu.

Sa Die de sa Sardigna est duncas sa festa de su Pòpulu sardu chi cheret ammentare sos chi lis narant “Bèsperos sardos”, est a nàrrere sa furriada populare de su 28 de abrile de su 1794 in ue nche aiant bogadu dae Casteddu a sos Piemontesos e a su vitze-re Balbiano, a pustis chi su guvernu torinesu aiat iscrocorigadu sas domandas de s’ìsula titulare de su Regnu de Sardigna.

Sos Sardos domandaiant de lis lassare una parte de sos impreos tziviles e militares e prus autonomia cunforma a sas detzisiones de sa classe dirigente locale. Su guvernu piemontesu aiat torradu chi nono a totu sas domandas e, duncas, sa burghesia tzitadina cun s’agiudu de sa populatzione nd’aiat pesadu sa furriada.

Su movimentu de rebellia fiat cumentzadu in sos annos Otanta de su Setighentos e fiat sighidu in sos annos Noranta interessende totu s’ìsula. Sa chèscia fiat polìtica e econòmica in su matessi tempus. Sa chèscia populare naschiat fintzas dae su fatu chi sa Sardigna l’aiant interessada in sa gherra de sa Frantza rivolutzionària contras de sos istados europeos e duncas contras de su Piemonte.

S’ischinchidda chi nd’aiat fatu pesare sa furriada fiat istada s’arrestu ordinadu dae su vitze-re de duas ghias de su partidu patriòticu, sos abogados casteddajos Vincenzo Cabras e Efisio Pintor. Fiat su 28 de abrile de su 1794: sa populatzione arrennegada meda aiat detzisu de nche bogare dae sa tzitade a su vitze-re Balbiano e a totu sos Piemontesos, chi in su mese de maju de cussu annu nche los aiant imbarcados a fortza e nche los aiant mandados a sa regione issoro. Incoragidos dae sos acontèssidos casteddajos, sos Aligheresos e sos Tataresos aiant fatu sa matessi cosa.