Dae oe movet una filera de proibimentos e istorbos TRANSIDURAS Dae sas deghe de note a sas chimbe de mangianu non faghet a essire, francu pro resones de traballu, de apretu mannu e de salude. Non faghet a si transire in intrada e in essida dae una regione a un’àtera nen dae unu comune a un’àteru, si non pro chistiones de traballu, de istùdiu, de salude o de apretu. A intro de su comune in ue si tenet sa residèntzia faghet a si mòvere, ma si racumandat de non fàghere essidas chi sunt pagu pretzisas. S’at a pòdere andare a un’àteru comune cun populatzione chi non propasset is 5.000 bividores, chi non siat prus a tesu de 30 chilòmetros, ma non faghet a andare a sas tzitades cabulogu de provìntzia. BÌSITAS A AMIGOS E A PARENTES A intro de su matessi comune est permìtidu a andare a una domo privada ebbia, una borta a sa die, intra de sas chimbe de mangianu e sas deghe de note, totu a su prus in duas persones a prus de cuddas chi ddoe bivent, acumpangiados dae pitzocheddos chi tenent prus pagu de 14 annos o dae àteras persones disàbiles o no autosufitzientes. TZILLERIS E RISTORANTES Sos tzilleris e sos ristorantes ant a pòdere traballare, si sunt organizados pro nche fàghere leare foras sa cosa de bufare e/o de papare. Totu custu fintzas a sas ses de sero. Pro sa cunsigna de sos prodùsidos a domo non b’at proibimentu perunu. In sas dies de festa e in sos bèsperos sos tzentros cummertziales sunt serrados, francu sas potecarias, sas parapotecarias, sas butegas de alimentares, sos istancos e sas edìcolas chi bi sunt. Serrados fintzas sos museos e sas mustras. ISCOLA In sas iscolas mannas s’at a fàghere sa didàtica a tretu pro su 50 % de su tempus, mentres at a èssere in presèntzia pro is istudiantes cun disabilidades e pro chie depet frecuentare sos laboratòrios; sas iscolas de sa pipiesa, sas elementares e sas iscolas mèdias ant a fàghere didàtica in presèntzia. Sas universidades sunt serradas, francu carchi faina pro sas matrìculas e pro sos laboratòrios. a.i.g. Attività realizzata col contributo della Regione Sardegna – IMPRENTAS 2020-2021. LR 22/2018, art22